Хўжайинлари ортидан Лавров ва Рубио ҳам гаплашиб олди

Бугун, 20 октябрь куни АҚШ Давлат котиби Марко Рубио ва Россия Ташқи ишлар вазири Сергей Лавров телефон орқали суҳбатлашиб, Дональд Трамп ва Владимир Путин ўртасидаги президентлик музокараларини муҳокама қилдилар. Бу ҳақда АҚШ ва Россиянинг ташқи сиёсат идоралари хабар берди.

АҚШ Давлат департаментининг маълум қилишича, Рубио ва Лавров Трамп ва Путин суҳбатидан “кейинги қадамлар”ни муҳокама қилган.

“Давлат котиби яқинлашиб келаётган учрашувларни Москва ва Вашингтон учун Президент Трампнинг таклифи асосида Россия-Украина можаросига узоқ муддатли ечим топишда ҳамкорлик қилиш имконияти сифатида таъкидлади”, дейилган баёнотда.

Россия ТИВ эса суҳбатни давлат раҳбарлари ўртасида эришилган “тушунувларни амалга ошириш учун мумкин бўлган аниқ қадамларни конструктив муҳокама қилиш” деб атади.

Путин ва Трамп 16 октябрь куни Украина Президенти Владимир Зеленскийнинг АҚШга ташрифидан бир кун олдин икки соат давом этган телефон суҳбат ўтказган. Суҳбат якунлангач, Трамп Россия Президенти билан Будапештда учрашишга келишилганини маълум қилди.

Музокаралар ортидан Трамп Донецк вилоятига оид бўлган можаро ҳақида қуйидагича фикр билдирди:

“Донецк вилояти урушни тугатиш учун “бўлиниши” керак, бунинг катта қисми Россия назоратида қолади. Ҳозир ҳам у деярли шундай. Менимча, ҳудуднинг 78% қисми аллақачон Россия томонидан эгалланган”, деди у журналистларга.

Трамп, шунингдек, жанглар тўхтатилиши зарурлигини таъкидлади:

“Кейинроқ улар ўзаро нимадир бўйича келишишлари мумкин. Лекин ҳозир ҳар икки томон фронт чизиғида тўхташи керак – уйларига қайтсин, ҳарбий ҳаракатларни тўхтатсин, одам ўлдиришни бас қилсин”.