Хориждан қайтган 1,5 мингдан ортиқ кишида ОИТС аниқланди

Ўтган йили хорижда бўлиб қайтган 1,7 млн фуқаронинг 434 минги, яъни 25 фоизи ихтиёрий ОИВ/ОИТС текширувидан ўтган ва уларнинг 1512 нафарида ушбу касаллик аниқланган. Бу ҳақда Олий Мажлис Қонунчилик палатасидаги “Миллий тикланиш” демократик партияси фракциясининг навбатдаги йиғилишида маълум қилинди.

Қайд этилишича, қонунчиликда бу борада мажбурий тиббий кўрик бўлмагани учун аксарият фуқаролар текширувга бормаяпти. Фракцияда биринчи ўқишда муҳокама қилинган қонун лойиҳаси билан энди узлуксиз 90 кун ва ундан ортиқ муддатда чет элда бўлиб қайтган 18 ёшдан 60 ёшгача бўлган Ўзбекистон фуқаролари, шунингдек, меҳнат фаолиятини амалга ошириш учун мамлакатга кириб келаётган хорижликларни мажбурий ОИВ текширувидан ўтказиш тартиби белгиланмоқда.

Қонун ташаббускорлари бу юқумли касаллик инсон организмида 90 кундан сўнг ўзини намоён қилишини қайд этган. 

“Энг асосийси, чет элдан қайтган фуқаро агар ўзининг, оиласининг соғлигини ўйласа, тезда тиббий кўрикдан ўтиши лозим. Текширувлар давлат ҳисобидан амалга оширилади”, дейди партия вакиллари. 

Эслатиб ўтамиз, аввалроқ “Миллий тикланиш” партияси битта китоб ўқиган маҳкумнинг жазо муддати 3 кунга қисқаришини назарда тутувчи қонун лойиҳасини ишлаб чиққан эди. Ушбу ташаббус орқали маҳкумларнинг билим ва маданиятини ошириш, уларнинг ижтимоий адаптациясини яхшилаш ва жазо муддатини ўтказиш жараёнида руҳий ва ахлоқий ривожланишга кўмаклашиш кўзда тутилган. Қонун лойиҳасига кўра, тасдиқланган рўйхат бўйича 1 та китоб ўқиган ва белгиланган имтиҳонни топширган маҳкумнинг жазо муддати 3 кунга қисқартирилади.