Хоразмда “Тозалаш-Антитеррор” тадбири ўтказилмоқда

Жорий йилнинг 1 декабрь кунидан бошлаб Хоразм вилояти ҳудудида  навбатдаги “Тозалаш-Антитеррор” профилактик тадбири ўтказилмоқда. Бу ҳақда Ўзбекистон Республикаси Ички ишлар вазирлиги хабар бермоқда. 

Қайд этилишича, тадбир давомида вилоят ички ишлар органлари томонидан ҳам бир қатор профилактик чора-тадбирлар амалга оширилмоқда.

“Маҳаллий ҳокимият ва ҳуқуқни муҳофаза қилувчи органлар, ҳамда кенг жамоатчилик ҳамкорлигида ўтказиладиган “Тозалаш-Антитеррор” профилактик тадбиридан кўзланган асосан мақсад жамоат тартибини сақлаш, фуқаролар хавфсизлигини таъминлаш билан биргаликда жиноят ва ҳуқуқбузарликларнинг барвақт олдини олишга қаратилган профилактик чора-тадбирлар самарадорлигини янада оширишдан иборатдир”, дейилади расмий хабарда.

Тадбирда ўқотар қуроллар билан боғлиқ қонунбузилиш ҳолатларининг олдини олиш мақсадида, ов қуролига эга бўлган фуқаролар томонидан қурол ва уларнинг ўқ-дориларини сақлаш тартибига риоя қилинишининг аҳволи ўрганилмоқда.

Тарғибот-ташвиқот ишлари натижасида, айрим фуқаролар тегишли ҳужжатларсиз уйида сақлаётган ов қуроллари ва уларнинг ўқ-дориларини ихтиёрий равишда ҳуқуқни муҳофаза қилувчи органларга топшириш ҳолатлари ҳам кузатилган. 

Маълумот ўрнида, ўқотар қуроллар, ўқ-дорилар, портловчи моддалар ва портлатиш қурилмаларини ўз ихтиёри билан ҳуқуқни муҳофаза қилиш органларига топширган шахс жавобгарликдан озод қилинади.