Хоразмда фуқародан “нафас олиш” учун пул талаб қилганлар ушланди
Жамият
−
14 Июнь 2023
17320Хоразм вилоятида ҳаво учун фуқаролардан пул талаб қилганлар қўлга олинди. Бу ҳақда Ички ишлар вазирлиги ҳузуридаги Тергов департаменти хабар берди.
Билдирилишича, шу йилнинг 9 июнь куни Хоразм вилоятида 38 ёшли фуқаро И.У. 36 ёшли М.Б. ва 30 ёшли М.Е.лар унга доимий таҳдид қилиб келаётганини айтиб, туман Ички ишлар бошқармасига мурожаат қилган.
Мурожаатчига кўра, юқоридаги шахслар ундан кўчада тинч юриши учун пул талаб қилган. Агар у пулларни вақтида бермаса, унга тегишли бўлган мол-мулкка шикаст етказишини айтиб, таҳдид қилган ва 2022 йилнинг 6 декабрь кунидан 2023 йил февраль ойигача ундан 58 млн сўм пулларини мажбуран ундириб келган.
Шунга қарамасдан, жорий йилнинг 6-8 июнь кунлари улар И.У.га қўнғироқ қилиб, 10 минг АҚШ доллари топиб, олиб келишини, акс холда уни тинч қўймаслигини, ушбу пулларни олиб келмаган тақдирда, унга тегишли бўлган транспорт воситаларини тортиб олиб қўйишини айтиб қўрқитган.
Ҳолат бўйича вилоят ИИБ Тезкор қидирув хизмати Жиноят қидирув бўлими уюшган жиноятчиликка қарши курашиш бўлинмаси ходимлари томонидан тезкор тадбир олиб борилган. Тадбирда юқорида кўрсатилган шахслар фуқаро билан олдиндан келишилган Гурлан тумани Мустақиллик кўчасида жойлашган кафелардан бирида учрашиб, ундан талаб қилган 10 минг АҚШ доллари пулларини олаётган вақтида ашёвий далиллар билан ушланган.
Мазкур ҳолат юзасидан Гурлан тумани Ички ишлар бошқармаси ҳузуридаги Тергов гуруҳи томонидан М.Б. ва М.Э.ларга нисбатан Ўзбекистон Республикаси Жиноят кодексининг 165-моддаси 2-қисми “б”, “в” бандлари (товламачилик) билан жиноят иши қўзғатилиб, ушбу шахсларга нисбатан “қамоққа олиш” тарзидаги эҳтиёт чораси қўлланилган.