Хоразмда бозор ёнди (видео)

Хоразм вилоятидаги бозорлардан бири ёниб кетди. Бу ҳақда вилоят Фавқулодда вазиятлар бошқармаси хабар берди.

Аниқланишича, ёнғин бугун, 18 июнь куни соат тунги 02:30 да вилоятнинг Ҳазорасп тумани “Боғдор” МФЙ ҳудудида жойлашган “Ҳазорасп универсал савдо комплекси” АЖ ҳудудида содир бўлган ҳамда ФВБга бу ҳақда хабар келиб тушган. 

Хабарга асосан ёнғин-қутқарувчилар соат 02:35 да воқеа жойига етиб бориб, ёнғин соат 04:04 да тўлиқ бартараф қилинган. Ёнғин-қутқарувчиларнинг саъй-ҳаракатлари натижасида ёнғин майдонини бошқа дўконларга ўтиб, кенгайиши олди олинган ва савдо комплекси ҳудудининг 4200 кв метр майдони сақлаб қолинган. Ёнғин оқибатида 300 кв метр майдонда жойлашган аралаш турдаги моллар савдо дўконлари ёниб зарарланган. 

Билдирилишича, ҳозирда ёнғиннинг юзага келиш сабаби ҳамда моддий зарар миқдори аниқланмоқда. Ёнғин оқибатида тан жароҳати олганлар ва ҳалок бўлганлар йўқ.

Эслатиб ўтамиз, аввалроқ Андижонда ғалла майдони ёниб кетгани ҳақида хабар берилганди.