Хоманаий кутилмаган баёнот берди

Эрон Олий раҳнамоси Мужтабо Хоманаий Эрон АҚШ ва Исроил устидан ғалаба қозонганини маълум қилди ҳамда Теҳроннинг рақибларини мамлакат ичида низо ва бўлиниш уруғини сочишга уринишда айблади. Унинг бу ҳақдаги мурожаатини “Euro news” келтирди.

Хоманаийнинг мурожаати Трамп маъмурияти Эрон билан олиб борилаётган музокараларда сезиларли ютуқларга эришилганини билдираётган ва АҚШ Президенти Дональд Трамп Мужтабо Хоманаий билан шахсан учрашиш эҳтимолини истисно қилмаётган бир пайтда эълон қилинган.

Бугун, 4 июнь куни Хоманаий АҚШ ва Исроил билан бўлган урушда Эрон ғалаба қозонганини таъкидлаб, кутилмаган баёнот билан чиққан.

“Азиз Эрон халқига шуни айтмоқчиманки, сизларнинг қуролли кучлар сафидаги жасур фарзандларингизга қарши курашда мағлуб бўлган маккор душман бугун нафақат жанг майдонида, балки жамоатчилик олдида ҳам чуқур ва оғир таҳқирни бошдан кечирмоқда. Шу сабабли у турли ҳийла-найрангларга таянмоқда”, деган Олий раҳбар.

Хоманаийнинг кутилмаган баёноти, эҳтимол, тинчлик келишувига яқинлашилаётганидан далолат бериши мумкин. Кўринишидан, у Эрон халқини бунга тайёрлар экан, бир вақтнинг ўзида бирдамликни сақлашга ҳам чақирмоқда.

“Тахминан 80 йил аввал Исроил деб аталувчи ҳарбий таянчни яратган ҳукмрон тизим Буюк Исроил деб аталувчи сохта ва тўқиб чиқарилган географиянинг шарқий чеккасида, яъни Фурот дарёсининг шарқида жойлашган, кўплаб устунликларга эга кучли ва мустақил Эроннинг мавжудлигини қабул қилмайди”, дея қўшимча қилган Хоманаий.

Эслатиб ўтамиз, аввалроқ АҚШ Президенти Дональд Трамп Эрон Олий раҳбари Мужтабо Хоманаий билан эҳтимолий учрашув ҳақида маълум қилганди ва Исроил Бош вазири Бинямин Нетаньяху билан бўлиб ўтган кескин суҳбатни тасдиқлаганди. АҚШ Президентининг сўзларига кўра, 56 ёшли Мужтабо Хоманаий Эрондаги муҳим қарорларни қабул қилишда иштирок этади ва мамлакатда катта ҳурматга эга.