Хитойга кириш осонлашди

2025 йил 20 ноябрдан бошлаб Хитойга ташриф буюрувчи саёҳатчилар кириш карталарини рақамли шаклда тўлдиришлари мумкин. Бу ҳақда "Аэротур" хабар берди.

Хабарга кўра, янгиланган тизим хорижий фуқаролар учун кириш жараёнини соддалаштиради. Саёҳатчиларга шахсий маълумотларини парвоздан олдин s.nia.gov.cn сайтида ёки мамлакатга етиб келгач, онлайн тарзда тўлдириш имконияти яратилди.

Тизим томонидан ариза тасдиқлангач, махсус QR-код яратилади ва паспорт назоратидан ўтишда айнан шу кодни кўрсатиш кифоя бўлади.

Шу билан бирга, анъанавий қоғоз шаклидаги карталар ҳам қўлланилишда давом этади – хоҳловчилар уларни одатдагидек аэропортда тўлдириши мумкин.

Электрон кириш картаси туристлар, иш сафари билан келган хорижликлар, шахсий таклифнома асосида ташриф буюрувчилар учун ҳамда виза билан ҳам, визасиз киришда ҳам мажбурий ҳисобланади.

Бироқ транзит йўловчилар ва ҳукумат делегацияси аъзолари электрон кириш картасини тўлдиришлари шарт эмас.

Мутахассислар электрон картанинг асосий қулайлиги тезкорлик эканини таъкидламоқда. Эътиборлиси шундаки, QR-код 24 соат давомида амал қилади. Шу боис, уни олдиндан тўлдириш шарт эмас.

Эслатиб ўтамиз, АҚШ Президенти Дональд Трамп 2026 йилги футбол бўйича Жаҳон чемпионати чипталарига эга бўлган саёҳатчилар учун виза тайинлаш жараёни тезлаштирилишини маълум қилганди. Унинг айтишича, FIFA’нинг янги “PAS” тизими “узоқ кутиш вақтига эга бўлган чипта эгалари”га элчихоналар ва консулликларда биринчи навбатда суҳбат қилиш имконини яратади.  

Комила Қобилова