Хитойда дунёдаги илк 10G тармоғи ишга туширилди

Хитойнинг Пекин шаҳри яқинидаги Сюнъань туманида илк кенг полосали 10G тармоғи ишга туширилди. Бу ҳақда “Mydrivers” хабар берди.

Маълум қилинишича, Huawei ва China Unicom компаниялари бирлашган ҳолда 10G тармоғини муваффақиятли ишга туширган.

“10G кенг полосали алоқани жойлаштириш дунёдаги биринчи 50G PON ечимига асосланган”, дейилади хабарда.

Маълум қилинишича, ушбу янги тармоқ интернетдаги кечикишларга деярли ўрин қолдирмайди.

Қайд этилишича, ҳозирда ишга туширилган янги технология орқали интернет тезлиги – юклаб олишда секундига 9834 Мбит, узатишда эса секундига 1008 Мбитни ташкил этмоқда.

Шундай қилиб, тармоқда фойдаланишда кечикиши атиги 3 миллисекунд бўлиб, бу рекорд даражада тезликни англатади. Мисол учун, икки соатлик 8K форматдаги фильмни бор-йўғи 72 сонияда юклаб олиш мумкин.

Инфратузилма ресурс талаб қиладиган ечимларни, хусусан, булутли хизматларни, шунингдек, виртуал ва кенгайтирилган иловаларини қўллаб-қувватлашга мўлжалланган.

Маълумот учун, январь ойи ҳолатига кўра, Хитойда тўрт миллиондан ортиқ 5G база станциялари фаолият юритмоқда – дунёнинг бошқа мамлакатларига қараганда кўпроқ дегани.

Эслатиб ўтамиз, аввалроқ Хитой 2050 йилгача термоядро синтези технологиясини жорий этиб, тоза энергия ишлаб чиқаришни йўлга қўймоқчилиги ҳақида хабар берилган эди.