Хитойда COVID-19 чекловлари ортидан намойишлар юзага келди (видео)

Хитойнинг Шинжон минтақасида намойишлар бўлиб ўтди. Бу ҳақда Reuters ахборот агентлиги хабар берди.

Манбага кўра, намойишлар бошланишига 24 ноябрь куни кўп қаватли бинода содир бўлган ёнғинда 10 кишининг ҳалок бўлгани сабаб бўлган. Гап шундаки, расмийлар, дастлаб, одамлар бинони тарк этишга муваффақ бўлганини айтишган, бироқ Хитой ижтимоий тармоқларида тарқатилган видеода бино қисман ёпилганлиги сабаб аҳоли ўз вақтида қочиб қутула олмагани акс этган. Бино ёпиқлигининг сабаби эса коронавирус чекловлари эди.

Шундан сўнг аҳоли норозилик намойишлари ўтказиш учун кўчага чиққан ва “Чекловларни тўхтатинг!” дея ҳайқиришган. Ушбу вазият тасвирланган видеолар ҳам ижтимоий тармоқларда тарқалган. 

Қайд этилишича, бу кадрлар Шинжон пойтахти Урумчидан олинган. Видеода одамлар Хитой мадҳиясининг “Қул бўлишни истамаганлар ўрнингдан тур!” дея бошланувчи жойини куйлаётгани акс этган.

Маълумки, Шинжон минтақаси Хитойдаги энг узоқ вақт мобайнида чеклов эълон қилинган ҳудуд ҳисобланади. Урумчининг 4 миллион кишилик аҳолиси 100 кунгача уйларини тарк эта олишмаган. Шаҳарда сўнгги икки кун ичида 100 га яқин янги коронавирус билан касалланиш ҳолатлари аниқланган.

Бугун, 26 ноябрь куни Урумчи расмийлари матбуот анжумани ўтказиб, COVID-19 чекловлари бинодаги одамларнинг қочишига ёки қутқарилишига тўсқинлик қилганини рад этишди. Аммо улар қўшимча текширув ўтказишларини ҳам айтишди. Яна бир расмий эса агар аҳоли ёнғин хавфсизлигини яхшироқ тушунса, тезроқ қочишлари мумкинлигини айтиб, барча айбни қурбонларнинг ўзига ағдарди.

Маълумот учун, Хитойда каронавирус билан касалланиш ҳолати кунига қарийб 32 мингтани ташкил қилмоқда. Инфекциянинг кўплаб шаҳарларда тарқалиши ортидан кенг кўламли чекловлар эълон қилинган.

Алибек Бейжанов