Хитой вакили Зеленский билан учрашди. Ташрифдан мақсад нима?

Хитойнинг Евроосиё масалалари бўйича махсус вакили Ли Хуй урушни тугатиш ва Хитой-Украина муносабатлари бўйича фикр алмашиш учун Украинага борди. Бу ҳақда Хитой Ташқи ишлар вазирлиги расмий вакили Ван Венбинг маълум қилди.

Унинг айтишича, Ли Хуй Украинага сафари давомида Президент Владимир Зеленский, Президент девони раҳбари Андрей Ермак, Ташқи ишлар вазири Дмитрий Кулеба, шунингдек, инфратузилма, энергетика ва мудофаа вазирлари билан учрашган.

Мамлакат олий раҳбарияти билан суҳбатда Хуй февраль ойида Хитой етакчиси Си Цзиньпин томонидан таклиф қилинган “тинчлик режаси”га асосланган Украинадаги урушни тугатиш бўйича Хитой позициясини баён қилган. Унинг таъкидлашича, Пекин ўз режаси асосида тинч йўл билан тартибга солишда иштирок этишга тайёр.

“Ли Хуй Хитойнинг Украина инқирозини сиёсий йўл билан ҳал қилиш бўйича позициясини баён қилди. Раис Си Цзиньпин томонидан илгари сурилган таклифлар Хитойнинг Украина можаросини сиёсий йўл билан ҳал қилишнинг асосий тамойилларидир. Инқирозни енгиб ўтишнинг уруш ва тинчлик музокараларини тугатиш учун шарт-шароит яратишдан бошқа ечими йўқ. Хитойнинг Украина инқирозини сиёсий йўл билан ҳал қилиш бўйича позициясидан келиб чиқиб, Хитой халқаро ҳамжамиятга энг юқори умумий келишувни шакллантиришда ёрдам беришга тайёр. Украина инқирозини ҳал қилиш ва урушни якунлаш, ўт очишни тўхтатиш ва тинчликни имкон қадар тезроқ тиклаш учун ўз саъй-ҳаракатларини амалга ошириш учун мўлжалланган”, дейилади Хитой ТИВ баёнотида.

Шунингдек, икки давлат вакиллари ҳам мамлакатлар ўртасидаги ўзаро манфаатли ҳамкорликни ривожлантириш учун биргаликда ишлашга келишиб олган.

Маълумот учун, 12 май куни Пекиннинг урушни тугатиш учун воситачи бўлиш нияти доирасида Хитойнинг махсус вакили Украинага ташриф буюриши маълум бўлган. Делегацияга Хитойнинг Россиядаги собиқ элчиси Ли Хуй етакчилик қилган. У 16-17 май кунлари Киевда бўлиб, Россия босқинидан кейин Украинага борган энг юқори мартабали хитойлик амалдорга айланди.

Хитойнинг махсус вакили Украинадан кейин Польша, Франция, Германия ва ниҳоят Россияга ҳам бориши режалаштирилган. АҚШ Давлат департаменти эса бу ташрифнинг аҳамиятини Хитой учун Украина позициясини эшитиш муҳимлиги билан изоҳлаган.