Хитой Тайванга 20 дан ортиқ самолёт ва 5 та ҳарбий кема жўнатди 

Хитой Халқ озодлик армияси (ХОА) Тайванга 21 та самолёт ва бешта ҳарбий кема жўнатди. Бу ҳақда орол Мудофаа вазирлиги маълум қилган.

“Бугун, 17 август куни соат 17:00 ҳолатига кўра, Тайвань Қуролли кучлари Тайвань яқинидаги денгиз ва ҳаво ҳудудида 21 та самолёт ҳамда бешта кеманинг фаоллигини қайд этди”, дейилади хабарда.

Таъкидланишича, бешта самолёт Тайвань бўғозининг “ўрта чизиғи” деб аталадиган ҳудудни кесиб ўтган, жумладан, иккита Су-30 қирувчиси, иккита  J-11 ва битта Y-8 электрон разведка самолёти.

Вазирлик маълумотларига кўра, Тайвань вазиятни кузатиш учун ҳаво патрулини юборган, радио орқали огоҳлантиришлар берган ва зенит-ракета тизимларини жойлаштирган.

Эслатиб ўтамиз, 14 август куни сенатор Эд Марки бошчилигидаги АҚШ Конгресси делегацияси икки кунлик ташриф билан Тайванга келди. Маркдан ташқари яна 4 нафар сенатор Тайванга етиб келди.

Ташрифга жавобан Хитой Халқ озодлик армияси (ХОА) Тайвань ҳудудий сувлари ва ҳаво кенгликлари яқинида ҳарбий машғулотларни бошлади. Хитой ТИВ америкалик конгрессменлар ташрифини олов билан ўйнашиш деб изоҳлади.

Маълумот учун, АҚШ Конгресси Вакиллар палатаси спикери Нэнси Пелоси 2 август куни кечқурун Тайбейнинг Соншан аэропортига етиб келди ва оролда бир кун ҳам бўлмай, 3 август куни қайтиб кетди. Бу АҚШ Конгресси Вакиллар палатаси спикерининг 1997 йилдан бери оролга қилган илк сафари бўлди. Пелоси Тайванда орол маъмурияти раҳбари Цай Ингвен билан учрашди.

Бу воқеа АҚШ ва Хитой муносабатларини таранглаштирди. Расмий Пекин Пелоси келишидан олдин Тайвань яқинида ҳарбий машғулотлар бошлаганди. Ташрифдан кейин эса орол атрофида бир қанча ҳудудларда машғулотларга старт берилди.

Хитой Ташқи ишлар вазирлиги сиёсатчининг ташрифига кескин норозилик билдирди ва уни қоралади. Унинг сафари “Ягона Хитой” тамойили ва учта Хитой-АҚШ коммуникелари қоидаларини жиддий равишда бузиши урғуланди. Пекин, шунингдек, Вашингтонни Хитойни назорат қилиш учун Тайвандан фойдаланишни тўхтатишга чақирди. Бундан ташқари, дипломатик департамент мамлакат суверенитетини ҳимоя қилиш учун барча зарур чораларни кўришига ишонтирди.

Оқ уйнинг фикрича, Пелосининг Тайванга ташрифи Хитой суверенитетини бузмаган, АҚШ маъмурияти эса “ўзини қўрқитишга йўл қўймаслигига” ишонтирган. Америка расмийлари минтақада кескинликнинг кучайишига ҳеч қандай сабаб йўқлигини таъкидламоқда.

Кремль Пелосининг сафарини минтақадаги кескинликни кучайтирувчи провокация деб атади. Президент матбуот котиби Дмитрий Песков дунёнинг барча давлатлари буни қайд этаётганига эътибор қаратди ва Россиянинг Хитой билан бирдамлигини қайд этди.

Хитой ҳарбийлари Пелоси ташрифидан кейин шай ҳолатга келтирилди. Армия Тайвань атрофидаги бир нечта нуқтада ҳарбий машғулотлар бошлади.

Хитой-Тайвань масаласи

Тайвань 1949 йилда Чан Кайши (1887-1975) бошчилигидаги Гоминдан қўшинларининг қолдиқлари Хитой фуқаролар урушида мағлубиятга учрагач, оролга қочиб кетганидан бери ўз маъмурияти томонидан бошқарилади. Ўшандан бери Тайвань коммунистлар ҳокимиятга келишидан олдин материкда мавжуд бўлган собиқ Хитой Республикаси байроғи ва бошқа атрибутларини сақлаб қолган.

Қўшма Штатлар 1979 йилда Тайвань билан дипломатик алоқаларни узиб, уларни ХХР билан ўрнатган. Вашингтон “ягона Хитой” сиёсатини тан олиш билан бирга, айни пайтда Тайбэй маъмурияти билан алоқаларни давом эттирмоқда ва оролга қурол етказиб бермоқда. 2020 йилда АҚШнинг аввалги Президенти Дональд Трамп маъмурияти Гонконгдаги вазият туфайли Пекин билан муносабатларнинг кескинлашуви фонида Тайвань билан алоқа ва алмашинувларни сезиларли даражада фаоллаштирди, бу эса ХХР расмийларининг норозилигига сабаб бўлди. 

АҚШ Тайваннинг асосий қурол етказиб берувчисидир. Жорий йилнинг апрель ойида Давлат департаменти Patriot зенит-ракета тизимларига хизмат кўрсатиш бўйича 95 миллион долларлик шартномани маъқуллади.