Хитой БМТнинг Эронга алоқадор резолюциясини блоклади

Россия ва Хитой АҚШ томонидан тайёрланган ва Эронга қарши санкцияларга риоя этилишини назорат қилувчи мустақил экспертлар гуруҳи мандатини яна бир йилга узайтиришни назарда тутувчи БМТ Хавфсизлик Кенгаши резолюцияси лойиҳасига вето қўйди. Бу ҳақда “Euronews” хабар берди.

Қайд этилишича, лойиҳа учун Хавфсизлик Кенгашининг 11 та аъзоси овоз берган, Россия ва Хитой қарши чиққан, Сомали ҳамда Покистон эса бетараф қолган.

Сўз Эрон ядро дастури муносабати билан 2025 йил 27 сентябрда қайта тикланган санкциялар ҳақида бормоқда. Улар Эроннинг хориждаги активларини музлатишни, қурол-яроғ етказиб беришга қўйилган чекловларни ва Теҳроннинг ракета дастурига қарши чораларни назарда тутади. Россия ва Хитойнинг ветоси санкцияларнинг ўзини бекор қилмайди, лекин уларга риоя этилишини мониторинг қилувчи экспертлар гуруҳи мандати узайтирилишига тўсқинлик қилади.

Эрон резолюция блоклангани учун Москва ва Пекинга миннатдорлик билдирган. Теҳроннинг маълум қилишича, бу мамлакатлар АҚШ ва унинг иттифоқчиларига Хавфсизлик Кенгашидан сиёсий мақсадларда фойдаланишга йўл қўймаган.

Вашингтон, ўз навбатида, Россия ва Хитойни санкция режимининг мумкин бўлган бузилишлари бўйича суриштирувга тўсқинлик қилишда айблаган. Франциянинг БМТдаги доимий вакили Жером Боннафон санкциялар Эронни ядро дастури бўйича мажбуриятларни бажаришга қайтаришга ундаш учун мўлжалланганини таъкидлаган.