Хитой АҚШни инсон ҳуқуқларини бузишда айблади

Америка Қўшма Штатларидаги инсон ҳуқуқлари билан боғлиқ вазият ёмонлашишда давом этмоқда. Бу ҳақда Хитой Халқ Республикаси Давлат кенгаши матбуот хизматининг 2023 йилда АҚШда инсон ҳуқуқлари билан боғлиқ вазият тўғрисидаги ҳисоботида айтилади.

"Қўшма Штатларда инсон ҳуқуқлари бўйича вазият тобора қутбланиб бормоқда, ҳукмрон озчилик сиёсий, иқтисодий ва ижтимоий устунликни сақлаб қолмоқда, оддий одамларнинг кўпчилиги эса борган сари маргиналлаштирилмоқда, уларнинг асосий ҳуқуқ ва эркинликлари эътибордан четда қолмоқда", дейилади ҳужжатда.

Хитой ҳукумат идорасининг таъкидлашича, Қўшма Штатларда қуролли зўравонлик кенг тарқалган. Америка ҳукумати сўз эркинлигини бостириш орқали фуқароларнинг шахсий ҳаётини назорат қилиш учун ўз ваколатларини суиистеъмол қилмоқда. ФҚБ тўлиқ кузатув тизимини ишга туширган ва полиция зўравонлиги туфайли ўлимлар сони энг юқори даражага етган. Озодликдан маҳрум қилиш ва маҳкумларни мажбурий меҳнатга жалб қилиш тизимида жиддий муаммолар мавжуд. Сиёсатчилар сайловларни манипуляция қилишда давом этмоқда ва этник озчиликлар мунтазам равишда ирқий камситишларга дуч келмоқда. Иқтисодий ва ижтимоий тенгсизликнинг кучайиши камбағалларнинг ҳаётини жуда қийинлаштиради. 

“Қўшма Штатлар ҳам Аёлларга нисбатан камситишнинг барча шаклларига барҳам бериш тўғрисидаги конвенцияни ва Бола ҳуқуқлари тўғрисидаги конвенцияни ҳалигача ратификация қилмаган”, дейилади Хитой баёнотида.

Расмий Пекинга кўра, халқаро майдонда Қўшма Штатлар узоқдан бери гегемонликка интилган, ҳокимият сиёсати билан шуғулланган ва гуманитар инқирозларни келтириб чиқарган. 

“АҚШ Қуролли кучлари бошқа давлатларнинг суверенитети ва инсон ҳуқуқларини поймол қилмоқда ва можаро зоналарига қурол етказиб беришда давом этмоқда, бу эса тинч аҳолининг катта қурбонларига олиб келади”, дейилади ҳисоботда. 

Ҳужжатда Қўшма Штатлар бошқа давлатларга нисбатан дунёнинг бошқа мамлакатларига қараганда кўпроқ санкциялар киритгани келтирилган.

“Қўшма Штатлардаги турли инсон ҳуқуқлари муаммолари, халқаро инсон ҳуқуқлари ҳаракатининг соғлом ривожланишига жиддий таҳдид солади ва тўсқинлик қилади", дейилади баёнотда.