Хитой АҚШ товарларига 84 фоизлик жавоб божлари жорий қилди

Қўшма Штатлар билан савдо можаросида Хитой ҳукумати Америка импортига илгари киритилган 34 фоизлик божлардан ташқари, 50 фоизлик янги жавоб тарифларини эълон қилди. Бу ҳақда бугун, 9 апрель куни Хитой Молия вазирлиги маълум қилди.

Билдирилишича, АҚШнинг барча товарларига божлар 10 апрелдан жами 84 фоиз миқдорида кучга киради.

Савдо можаросининг кучайиши

Бир кун аввал АҚШ Президенти Дональд Трамп Хитойдан импорт қилинадиган маҳсулотларга 50 фоиз миқдорида қўшимча бож жорий этилишини эълон қилди. Улар 9 апрелдан, аввалроқ эълон қилинган 34 фоизлик тарифлар билан бир вақтда кучга кирди. Амалдаги тарифлар билан биргаликда Хитойнинг АҚШга импорт қилинадиган махсус савдо божларининг умумий миқдори шу тариқа 104 фоизни ташкил этади.

Оқ уй матбуот котиби Кэролайн Ливитт Трамп Пекиндан қўнғироқни кутаётганини ва “Хитой қўлини чўзганда меҳрибон бўлишга” ваъда берганини айтди.

north_east

Хитой Трампнинг бож инқирозини имкониятга айлантирмоқчи

Шу билан бирга, бир кун аввал Америка Президенти Хитой билан тариф масалалари бўйича кейинги музокараларни истисно қилган эди.

Трампнинг хатти-ҳаракатлари бутун дунёдаги сиёсатчилар ва иқтисодчиларнинг кескин танқидига сабаб бўлди ва биржалар савдо можаросига индексларнинг сезиларли пасайиши билан жавоб берди. Бундан ташқари, нефть нархи кескин тушиб кетди. Истеъмол нархлари ҳам бутун дунё бўйлаб кўтарилиши ва иқтисодий ўсишнинг секинлашиши кутилмоқда.

DPA агентлигининг ёзишича, Трампнинг дунёнинг аксарият мамлакатларига янги савдо тарифларини жорий этиш қарори унинг савдо сиёсатидаги энг тажовузкор ва кенг кўламли қадам бўлди.