Халқаро суд Исроилга геноциднинг олдини олишни буюрди

БМТ Олий суди Жанубий Африканинг Исроилга қарши даъвоси бўйича вақтинчалик қарор чиқарди. Гаага суди яҳудий давлатига Ғазо секторида геноциднинг олдини олиш учун барча чораларни кўришни буюрди. Қарорни 17 нафар судьядан 15 нафари қўллаб-қувватлади.

Учрашувни Халқаро суд раҳбари Жоан Донохью очди. 

"Суд минтақада содир бўлаётган инсоният фожиаси кўламини жуда яхши билади ва давом этаётган азоб-уқубатлардан чуқур хавотирда", дейди у.

Йиғилишда у Исроил ҳарбийларига қаратилган айбловни ўқиб чиқди, шунингдек, баъзи исроиллик сиёсатчиларнинг нутқларини келтирди. Хусусан, у Исроил Мудофаа вазири Йоав Галлантнинг ЦАХАЛ Ғазо секторида қандай бўлишидан қатъи назар, "ҳамма нарсани йўқ қилади" деган иборасини мисол қилиб келтирди.

Донохью хонимнинг сўзларига кўра, даъво бўйича вақтинчалик қарор иш тўлиқ кўриб чиқилгунга қадар Ғазо секторидаги гуманитар вазият қайтариб бўлмас ҳолга келиши мумкинлиги сабабли қабул қилинган. Бундан ташқари, суд қарори Исроилдан аҳолининг турмуш тарзини таъминлаш учун зарур бўлган хизматларни тақдим этишини талаб қилади.

Ҳакамлар ҳайъати қарорига кўра, Исроил раҳбарияти ҳам тайинланган қарорлар ижроси юзасидан ҳисобот тақдим этиши керак. Шунингдек, суд Исроилга ҳеч қандай шарт қўймасдан гаровга олинганларни зудлик билан озод қилишни буюрди.

Қайд этиш жоизки, БМТ суди Исроилга Ғазода геноциднинг олдини олиш учун чора кўришни буюрган бўлса-да, суд қарорида ўт очишни тўхтатиш талаби қўйилмаган.

“Associated Press” агентлигининг қайд этишича, даъвони ҳал қилиш учун йиллар керак бўлиши мумкин. Исроил геноцид айбловларини рад этади. Халқаро судда яҳудий давлатининг позициясини адвокат Гилад Ноам ҳимоя қилади. 12 январь куни Ноам Жанубий Африканинг сўровини қондириш “террорчи гуруҳларга улар уруш жиноятлари ва инсониятга қарши жиноятлар содир этиши ва кейин ушбу суддан ҳимоя сўраши мумкинлиги ҳақида сигнал юборишини” айтган.