“Кетишга тайёр эдим”. Роналду можаро юзасидан баёнот берди

Ҳужумчи Криштиану Роналду 2026 йилги Жаҳон чемпионатидан кейин Португалия терма жамоасидаги фаолиятини якунлашга тайёр бўлган ва ҳатто бу ҳақда баёнот ҳам тайёрлаган. Бироқ Португалия футбол федерацияси раҳбарияти ҳамда терма жамоанинг янги бош мураббийи Жорже Жезус футболчини бу қароридан қайтарган. Бу ҳақда Роналду Instagram саҳифасида маълум қилди.

“2026 йилги Жаҳон чемпионатидан кейин мен Португалия халқига мактуб тайёрлаган эдим. Унда терма жамоани бутунлай тарк этаётганимда айтишни истаган сўзларим бор эди. АҚШдан қайтаётганимда федерация президенти мендан кетиш қароримни қайта кўриб чиқишимни сўради ва талаб қилди. Шундан сўнг у мендан ўша пайтда кўриб чиқилаётган бош мураббий номзодлари, жумладан, ҳозирги мураббий ҳақидаги фикримни сўради. Мен бу тўғри танлов бўлишини айтдим. Шунинг учун ҳозирги бош мураббий менга таништирилган куни унинг танловидан чин дилдан мамнун бўлдим. Бу тўғри қарор эди, натижалар ҳам буни тасдиқламоқда”, дейди Роналду.

Роналду Миллатлар лигаси янги мавсумининг Уэльсга қарши дастлабки ўйинида 1:0 ҳисобидаги ғалабада иштирок этди. Кейин эса Норвегияга қарши 2:1 ҳисобида якунланган учрашувда захирада қолдирилди.

Футболчининг сўзларига кўра, у дастлаб Норвегияга қарши баҳсда майдонга тушиши режалаштирилмаган. Бироқ мураббий ундан 30 дақиқага тайёр туришни сўраган ва футболчи қизиб олиш учун чигалёзди машғулотларни амалга оширган, аммо якунда захирада қолган. Роналдунинг айтишича, мураббий бу ҳолатни ўйиндан кейинги матбуот анжуманида тушунтириши керак эди, аммо буни амалга оширмаган.

Аввалроқ, Роналдунинг терма жамоани тарк этиш нияти борлиги ҳақида хабар берган. Кейинчалик CNN Portugal нашри Жорже Жезус бош мураббий бўлиб қолар экан, футболчи терма жамоа сафида ўйнаш ниятида эмаслигини маълум қилган.

Португалия футбол федерациясининг интизом қоидаларига кўра, терма жамоа йиғинини рухсатсиз тарк этиш футболчининг бир ойдан олти ойгача муддатга ўйинлардан четлатилиши ва 500 дан 1000 еврогача жаримага тортилишига сабаб бўлиши мумкин.

Маълумот учун, 41 ёшли Криштиану Роналду беш карра Чемпионлар лигаси ғолиби, Европа чемпиони ва икки карра Миллатлар лигаси ғолиби ҳисобланади. У миллий терма жамоалар, Европа чемпионатлари, Чемпионлар лигаси ҳамда клублар ўртасидаги Жаҳон чемпионати тарихида энг кўп гол урган футболчилардан бири ҳисобланади. Роналду 2022 йил декабридан буён Саудия Арабистонининг “Ал-Наср” клуби шарафини ҳимоя қилиб келмоқда. У фаолияти давомида 979 та гол урган бўлиб, уларнинг 146 таси Португалия терма жамоаси, 833 таси эса клублар сафида киритилган.