Кекса онахон Нетаньяхуни ўлдиришга уринди

Исроиллик кекса аёл Бош вазир Биньямин Нетаньяхуга суиқасд уюштиришда гумонланиб, Шин Бет хавфсизлик хизмати томонидан ҳибсга олинди. Бу ҳақда “The Jerusalem Post” хабар берди.

Нашрга кўра, эртага, 24 июль куни аёлнинг суди бўлиб ўтади. У террорчилик ҳаракатини амалга оширишга тил бириктиришда айбланмоқда.

Айтилишича, гумонланувчи 70 ёшдаги аёл ҳукуматга қарши намойишчи бўлиб, у оиласи билан суҳбатда “Бош вазир Биньямин Нетаньяхуни ўлдириш ниятини билдиргани” ва унга граната билан ҳужум қилишни режалаштиргани учун ҳибсга олинган.

“Yedioth Ahronoth” нашрининг ёзишича, аёл норозилик ҳаракатининг бошқа фаолларига мурожаат қилиб, қурол олишга уринган, шунингдек, Нетаньяхунинг хавфсизлиги қандай ташкил этилганини билиб олган.

Ҳуқуқ-тартибот идораларига унинг нияти ҳақида маълумот келиб тушганидан сўнг, гумонланувчи Шин Бет томонидан қўлга олинган. Аёл сўроқ қилиш учун Оғир ва халқаро жиноятларни тергов қилиш миллий бошқармасига олиб кетилган. У айбини қисман тан олган.

Аёлнинг ёши, соғлиғи ва шахсий шароитларини инобатга олган ҳолда, ўша куннинг ўзидаёқ чекланган шартлар остида қўйиб юборилган. Профилактика чораси сифатида гумонланувчига Бош вазир ва давлат муассасаларига яқинлашиши тақиқланган.

Эслатиб ўтамиз, аввалроқ Сурия муваққат президенти Аҳмад аш-Шара сўнгги етти ой ичида учта суиқасд нишонига айлангани хабар қилинганди.