Картошкачиликни ривожлантириш учун 400 млрд сўм йўналтирилади

Жамият

image

Бу йил картошкачиликни ривожлантириш учун Қишлоқ хўжалиги жамғармасидан 400 миллиард сўм йўналтирилади. Бу ҳақда бугун, 30 январь куни Президент Шавкат Мирзиёев бошчилигида ўтказилган томорқада ва ижарага берилган экин ерларида даромадли маҳсулот етиштиришнинг янги тизими бўйича йиғилишда маълум қилинди. 

Қайд этилишича, картошка 290 минг гектарда экилса ҳам, эҳтиёжнинг бир қисми импортдан қопланяпти. Негаки нав ва ҳосилдорлик яхши эмас.

Шу боис Картошкачилик илмий-тадқиқот институтига иқлимга мос, серҳосил навларни яратиш, “ин-витро” усулида йилига 3 миллион дона туганаклар етиштириб, тарқатиш вазифаси қўйилди.

Импорт қилинган ҳамда маҳаллий етиштирилган уруғлик картошкани сотишда қўшилган қиймат солиғининг 50 фоизи “кешбэк” сифатида қайтариб берилади. Қолаверса, 2027 йилдан картошкага эҳтиёж тўлиқ ички имконият ҳисобидан қопланиши режалаштирилган.

Шунингдек, маҳсулот етиштириш ва қайта ишлаш учун техникалар етказиб бериш, деҳқонларга қулай лизинг маҳсулотлари тақдим этиш бўйича топшириқлар берилди.

Эслатиб ўтамиз, олдинроқ Қишлоқ хўжалиги вазирлиги картошка қимматлаганига муносабат билдириб, амалга оширилаётган саъй-ҳаракатлар натижасида февраль-март ойларида нархлар барқарорлашиши, апрель-май ойларида эса пасайиши кутилаётганини маълум қилганди.


Мақола муаллифи

Теглар

Шавкат Мирзиёев Картошка

Баҳолаганлар

0

Рейтинг

3

Мақолага баҳо беринг

Дўстларингиз билан улашинг