Канададаги мактабда ҳам отишма: ўнлаб одамлар ҳалок бўлди

Канаданинг Британия Колумбияси провинциясидаги Тумблер-Риж шаҳри ўрта мактабида содир бўлган отишма оқибатида камида 10 киши ҳалок бўлди, жумладан ҳужумчи ҳам. Бу ҳақда “Global News” хабар берди.

Воқеа жойига етиб келган полиция ходимлари мактаб биносида олти нафар ҳалок бўлган шахсни аниқлаган, яна бир жабрланувчи шифохонага олиб кетилаётганида вафот этган. CBS хабарига кўра, ҳодиса билан боғлиқ деб тахмин қилинаётган бошқа жойдан яна икки нафар ҳалок бўлган шахс топилган. Гумонланувчи ҳужумчи жароҳатлар билан ўлик ҳолда аниқланган, полиция маълумотига кўра, бу жароҳатлар ўзига ўзи етказилган бўлиши мумкин.

Ҳаёт учун хавфли оғир жароҳат олган икки киши вертолёт орқали шифохонага етказилган. Яна қарийб 25 киши маҳаллий тиббиёт марказида жароҳатлар бор-йўқлиги бўйича текширувдан ўтказилмоқда.

Ҳужумчи ҳақида дастлабки хабарда гумонланувчи жигарранг сочли, кўйлак кийган аёл сифатида тасвирланган. Кейинчалик полиция бошқа гумонланувчилар йўқлигини билдирган. Ҳуқуқ-тартибот органлари жабрланганларни аниқлаш ишларини давом эттирмоқда.

Тумблер-Риж ўрта мактабида 7–12-синфларда таҳсил олувчи тахминан 170 нафар ўқувчи бор. Мактабдан бир километрдан кам масофада бошланғич мактаб жойлашган. Хабарга кўра, ҳар икки таълим муассасаси ҳафта охиригача ёпилган. Маҳаллий тиббиёт марказида ҳам ташрифлар чекланган.

Эслатиб ўтамиз, 9 февраль куни АҚШнинг Мэриленд штатида жойлашган Роквилл шаҳридаги Томас Вуттон номидаги ўрта мактабда отишма содир бўлганди ва оқибатда бир нафар ўқувчи шифохонага етказилган.