Канада Финляндия ва Швециянинг НАТОга аъзолигини ратификация қилган биринчи давлат бўлди

Олам

image

Канада Финляндия ва Швециянинг НАТОга қўшилиши тўғрисидаги протоколларни ратификация қилган биринчи Шимолий Атлантика альянси давлати бўлди. Бу ҳақда Канада Бош вазири Жастин Трюдонинг кеча, 5 июль куни эълон қилган баёнотида айтилади. 

“Канада Финляндия ва Швециянинг НАТОга қўшилиш протоколларини ратификация қилган биринчи давлат бўлди. Бу икки давлатни [иттифоқдаги] тўлиқ аъзоликка яқинлаштиради”, дейди Бош вазир. 

Трюдо икки давлат НАТОга тез ва самарали интеграция қила олишига ишонч билдирган. 

5 июль куни Финляндия ва Швеция Ташқи ишлар вазирлари Пекка Ҳаависто ва Анн Линде ҳамда НАТОнинг 30 та давлати вакиллари Шимолий Атлантика иттифоқига икки мамлакатнинг қўшилиши тўғрисидаги протоколларни НАТО штаб-квартирасида расмий маросимда имзоладилар. Ҳужжатлар НАТОнинг барча давлатлари томонидан ратификация қилинганидан сўнг, Хельсинки ва Стокгольм ташкилотга аъзо бўлади. Тасдиқлаш хатлари сақлаш учун АҚШ Давлат департаментига юборилади. 

Финляндия ва Швециянинг НАТОга интилишлари

Россиянинг Украинага қарши уруш бошлаши ортидан узоқ йиллар давомида бетарафлик мақомида бўлиб келган Финляндия ва Швеция НАТОга қўшилиш ҳаракатига тушди. 

Жорий йилнинг 12 май куни Финляндия Президенти ва Бош вазири мамлакат НАТОга қўшилишини қўллаб-қувватлаши маълум бўлди. НАТО ҳам бу давлатни ортиқча жараёнларсиз ташкилотга олишга тайёрлиги билдирилди.

Бунинг ортидан расмий Москва Финляндия НАТОга қўшилса, Россия ўз миллий хавфсизлигига бу борада юзага келадиган таҳдидларни тўхтатиш учун ҳам ҳарбий-техник, ҳам бошқа характердаги жавоб чораларини кўришга мажбур бўлишини эълон қилди.

11 май куни эса Буюк Британия Бош вазири Борис Жонсон иккала Скандинавия давлатига ташриф буюриб, Швеция ва Финляндия раҳбарлари билан ўзаро хавфсизлик кафолатларини имзолади.

13 май куни эса НАТО аъзоси бўлган Туркия Президенти Ражаб Тойиб Эрдўған Финляндия ва Швециянинг НАТОга аъзо бўлишига ижобий қарамаслигини билдирди.

15 май куни Финляндия ҳам, Швеция ҳам НАТОга аъзо бўлишга қарор қилганини билдирди.

18 май куни Финляндия ва Швеция НАТОга аъзо бўлиш учун ариза берди,  бироқ Туркия бу давлатлардан курд ташкилотларини террорчи деб эълон қилишни, терроризмда ёки 2016 йилдаги давлат тўнтаришига уринишда иштирок этишда айбланганларни Анқарага экстрадиция қилишни ва Туркияга қурол етказиб беришга қўйилган тақиқларни олиб ташлашни талаб қилиб, аъзолик жараёнини дарҳол тўхтатди. 

28 июнь куни Туркия, Финляндия Президентлари, Швеция Бош вазири ва НАТО Бош котиби иштирокида НАТО саммити олдидан тўрт томонлама музокаралар ўтказилди. Музокаралар натижасига кўра, уч мамлакат Ташқи ишлар вазирлари “Учлик меморандуми”ни имзоладилар. Меморандумга кўра, Финляндия ва Швеция НАТОга аъзо бўлиш учун халқаро терроризм ва экстремизмга қарши курашда барча талабларни бажаради, Туркияда террористик ташкилот деб тан олинган тузилмалар – "Курдистон ишчи партияси", "Сурия халқ мудофааси отряди" ва ФЕТО билан мулоқотни тўхтатади ва ўзи ҳам уларни террористик ташкилот сифатида қайд этади. Қолаверса, миллий қурол-яроғ эмбаргоси олиб ташланади.


Мақола муаллифи

Теглар

НАТО

Баҳолаганлар

11

Рейтинг

3.1

Мақолага баҳо беринг

Дўстларингиз билан улашинг