Камчаткада сайёҳлар адашиб, музлаб қолди. Қурбонлар бор

Россиянинг Камчатка яриморолида сайёҳлик гуруҳи адашиб қолди. Оқибатда икки киши ҳалок бўлган, беш киши қаттиқ музлаб қолган. Бу ҳақда кеча, 10 апрель куни “Новости России 76” хабар берди.

Маьлум қилинишича, Санкт-Петербург ва Череповецдан 21 ёшдан 31 ёшгача бўлган тўққиз сайёҳдан иборат гуруҳ Наличево табиат боғи орқали тахминан 100 километр юришни ва 10 апрель куни маршрутни якунлашни режалаштирган. Улар жорий йилнинг 28 март куни Пиначево қишлоғидан лагерга борган. Аммо 3 апрель куни гурух аъзолари ўзаро жанжаллашиб қолиб, ажралган. Менежер ва яна бир сайёҳ чодир ҳамда сунъий йўлдош телефонини олиб, қисқартирилган йўналишда, етти киши эса ҳеч қандай ускуналарсиз йўлда давом етган.

Қайд этилишича, 7 апрелдан кейин асосий гуруҳ билан алоқа йўқолган ва қутқарувчилар қидиришга киришган. 10 апрель куни 7 соат давом этган қидирув ишларидан сўнг гуруҳ топилган ва сайёҳлардан икки киши вафот етгани маълум бўлган. Яна беш киши қаттиқ музлаб, омон қолган. Сайёхлар вертолёт ёрдамида евакуация қилинган. 

Жабрланганларга тиббий ёрдам кўрсатилаётган ҳамда “эҳтиётсизлик туфайли ўлимга сабаб бўлиш” ва “хавфсизлик талабларига жавоб бермайдиган хизматлар кўрсатиш, оқибатда икки ёки ундан ортиқ одам ҳалок бўлиши” моддалари билан жиноят иши очилган.

Эслатиб ўтамиз, аввалроқ Россиянинг Хабаровск ўлкасида уч кишидан иборат сайёҳлар гуруҳи йўқолган эди. Кейинроқ, Охотск денгизи ҳудудида балиқчилар тасодифан уларнинг кемасини топишга муваффақ бўлган. Лекин сайёҳлардан фақатгина бир эркак омон қолган ва у вафот этган яқинларининг жасадларини ҳам қайиқда сақлаб қолган.

Шаҳзода Шукуруллаева