Камбағал оилаларга бириктирилган минг нафар раҳбар натижа кўрсата олмади

Ўзбекистонда камбағал оилаларга бириктирилган раҳбарларнинг 1 минг нафари натижа кўрсата олмади. Бу ҳақда бугун, 13 декабрь куни Президент Шавкат Мирзиёев раислигида ўтказилаётган ижтимоий ҳимоя соҳасида амалга оширилган ишлар ва 2025 йилдаги устувор вазифалар юзасидан видеоселектор йиғилишида маълум қилинди.

Йиғилишда ҳамма раҳбарлар ҳам эҳтиёжманд аҳолини ишли қилиб, даромадини кўпайтириш, уларга манзилли ижтимоий хизмат ва ёрдамлар кўрсатишни тўғри ташкил қила олмаётгани кўрсатиб ўтилди. Хусусан, камбағал оилаларга бириктирилган раҳбарларнинг 1 минг нафари натижа кўрсата олмади. 184 нафари ушбу оилалар хонадонига бирор марта ҳам бормаган.

Ногиронлиги бор шахслар бандлиги даражаси республикада 20 фоизга етгани билан, бу ишлар Жалақудуқ, Чимбой, Пастдарғом, Чортоқ  ва Денов туманларида қониқарсиз. Мутасаддиларга ушбу туманларни намунали қилиш, ҳар бир масъулга аниқ вазифа белгилаш топширилди.

Шунингдек, келгуси йил Инвестиция дастурига кирадиган 598 та ижтимоий объект лойиҳаси ногиронлиги бор одамларга мослаб ишлаб чиқилмагани танқид қилинди. Ушбу вилоят, туман ҳокимларига хатоларни тўғрилаш топширилди.

Маълумот учун, бугунги йиғилишда БМТнинг Ўзбекистондаги доимий координатори Сабинэ Махл, UNICEF ваколатхонаси раҳбари Рехина Мария Кастижио ва Жаҳон банкининг Марказий Осиё бўйича минтақавий директори Татьяна Проскурякова ҳам иштирок этмоқда.