Қўқондаги “дом”да газ портлади 

Бугун, 12 март куни Фарғона вилояти Қўқон шаҳрида жойлашган кўп қаватли уйларнинг бирида газ-ҳаво аралашмасининг чақнаши содир бўлди ва бунинг ортидан ёнғин чиқди. Бу ҳақда вилоят Фавқулодда вазиятлар бошқармаси хабар берди. 

Маълум қилинишича, соат 12:58 да Қўқон шаҳар “Мустақиллик” МФЙдаги кўп қаватли уйнинг хонадонлардан бирида ёнғин бўлгани юзасидан хабар келиб тушган.

Хабарга асосан ёнғин-қутқарув экипажлари  13:04 да етиб бориб, 13:06 да ёнғин ўраб олиниб, 13:10 да батамом ўчирилган.

Ҳодиса оқибатида икки нафар фуқаро куйиш тан жароҳатини олиб шифохонага ётқизилган. 

“Вафот этганлар йўқ”, дейилади хабарда.

Қайд этилишича, ёнғин келиб чиқиш сабаблари ўрганилганида газ-ҳаво аралашмасининг чақнаши натижасида содир бўлганлиги аниқланган.

Эслатиб ўтамиз, аввалроқ Навоий вилояти Навоий шаҳри Навоий кўчасида жойлашган “Навоий азот” акциядорлик жамиятининг 25-цехи лабораториясида газ-ҳаво аралашмасининг чақнаши ҳодисаси рўй бергани ҳақида хабар берилганди. Ушбу чақнаш оқибатида ёнғин келиб чиққан ва бир киши ҳалок бўлган.