Қозоғистонда вазир ўринбосари ҳибсга олинди (видео)

Қозоғистонда Транспорт вазири ўринбосари Сатжан Аблалиев ҳибсга олинди. Бу ҳақда бугун, 4 август куни “Tengrinews” хабар берди.

Қайд этилишича, Аблалиевнинг қўлга олингани ҳақида илк маълумотлар 2 август куни пайдо бўлган. Бироқ ўшанда Қозоғистон Миллий хавфсизлик қўмитаси (МХҚ) бу хабарни тасдиқламаган. Шунга қарамай, бир қатор манбалар у ҳақидаги маълумотларнинг ишончли эканини билдирган.

Бугун, 4 август куни МХҚ расмий тарзда Аблалиевнинг ҳибсга олинганини тасдиқлади ва тезкор видеотасвирларни эълон қилди. Кадрларда ҳуқуқни муҳофаза қилувчи орган ходимлари амалдорни кўчада тўхтатиб, кейинчалик унинг уйида тинтув ўтказаётганини кўриш мумкин. Суриштирув ҳаракатлари давомида гулдон ичидан катта миқдорда нақд пул топилган.

МХҚ ҳозирча ҳибсга олишнинг расмий сабабларини очиқламаган. Шу билан бирга, интернетда унинг 78 минг доллар миқдорида пора олгани бўйича гумонлар ва ноқонуний ҳомийликда айбланиш эҳтимоллари ҳақида тахминлар тарқалмоқда.

Маълумот учун, Аблалиев 2023 йил октябрь ойидан бери Қозоғистон Транспорт вазири ўринбосари лавозимида ишлаб келаётган бўлган. Бунгача у Шимолий Қозоғистон вилояти ҳокими ўринбосари бўлган ва Автомобиль йўллари қўмитасида фаолият юритган.

Эсалтиб ўтамиз, аввалроқ Қирғизистон Миллий хавфсизлик давлат қўмитаси собиқ ходимини фирибгарликда гумон қилиб, ҳибсга олганди.