Қозоғистонда машина бекатдаги одамларни босиб кетди (видео)

Қозоғистоннинг Олмаота шаҳрида Mercedes-Benz русмли енгил машина бекатда автобус кутаётган одамлар устига юриб кетди. Бу ҳақда шаҳар Йўл ҳаракати хавфсизлиги бошқармасига таяниб, “Nur.kz” хабар берди.

Маълум қилинишича, бугун, 28 август куни соат 12:20 ларда Олмаота шаҳридаги Абилайхон кўчаси ва Райимбек шоҳ кўчаси кесишмасида Mercedes-Benz автобус кутаётган одамларни босиб кетган. Оқибатда 7 киши турли даражадаги жароҳатлар билан шаҳардаги тиббиёт муассасасига ётқизилган. 

Полициянинг маълум қилишича, 36 ёшли Mercedes ҳайдовчиси Абилайхон кўчасидан чапга бурилишда бошқарувни йўқотган ва Райимбек шоҳ кўчасидаги автобус бекатига бориб урилган. 

“Мазкур ЙТҲ билан боғлиқ фактлар ИИБ ходимлари томонидан ўрганилмоқда, ҳолат юзасидан батафсил маълумот берилади”, дейилади хабарда.

Эслатиб ўтамиз, Қозоғистоннинг Туркистон вилоятида содир бўлган йўл-транспорт ҳодисаси оқибатида 4 киши ҳалок бўлган эди. Шунингдек, Украинанинг Винница вилоятида юк машинаси ва “Жигули” ўртасида содир бўлган йўл-транспорт ҳодисаси оқибатида 12 киши ҳалок бўлган эди.