Қозоғистонда 25 йил олдинги қотиллик фош этилди

Қозоғистоннинг Уральск шаҳрида бундан 25 йил олдин содир бўлган қотиллик фош этилди. Бу ҳақда мамлакат Ички ишлар вазирлиги хабар берди.

Қайд этилишича, бу қотиллик 2000 йилнинг декабрь ойида содир этилган. Оқибатда икки маҳаллий шахс ўқ жароҳатидан вафот этган. Бу қотилликнинг асосий сабаби эса молиявий келишмовчилик бўлган.

Орадан 25 йил ўтиб, қидирув ишлари натижасида икки гумонланувчи – буюртмачи ва жиноят содир этган шахс ҳибсга олинган. Уларга қарши тергов ишлари давом этмоқда.

“Узоқ вақт давомида жиноят тўғридан тўғри далиллар йўқлиги сабабли ҳал қилинмаган. Бироқ тергов-оператив гуруҳнинг пухта иши туфайли воқеалар занжирини тиклаш ва гумонланувчиларга қарши чиқиш мумкин бўлди. Судгача бўлган тергов давомида уларнинг иштирокини тасдиқловчи қўшимча далиллар топилди. Жиноят иши “гуруҳ томонидан икки ёки ундан ортиқ шахсни олдиндан тил бириктирган ҳолда ўлдириш” моддаси бўйича олиб борилмоқда”, деди Ички ишлар вазирлигининг бўлим бошлиғи Канат Нурмагамбетов.

Эслатиб ўтамиз, йил бошида Россиянинг Канаш шаҳридаги дўконлардан бирида қорбобо кийимидаги шахс дўкон эгасини отиб ўлдирганди. Гумонланувчи эртаси куни қишлоқдаги яшаш жойида ушланган.

Сара Комилжонова