Қозоғистон натрий цианиди ишлаб чиқарувчи завод қуришни режалаштирмоқда

Қозоғистон ҳукумати 2025 йил охиригача республика жанубида олтин қазиб олиш саноати хавфсизлигини таъминлайдиган цианид ишлаб чиқарувчи заводни ишга тушириш ниятида. Бу ҳақда Саноат ва қурилиш вазирлиги матбуот хизмати хабар берди. 

“Жамбил вилоятида олтин қазиб олиш саноатининг стратегик хавфсизлигини таъминлайдиган, ички бозорни тўлиқ таъминлайдиган ҳамда Россия ва Хитойдан импорт ўрнини босувчи натрий цианид ишлаб чиқарувчи завод қуриш лойиҳаси амалга оширилмоқда. Лойиҳа юқори экспортга йўналтирилган салоҳиятга эга, чунки яқин ўн йил ичида қўшни мамлакатлар (Ўзбекистон, Қирғизистон, Тожикистон, Мўғулистон) да талабнинг ортиши прогноз қилинмоқда”, дейилади хабарда. 

Бошқарма маълумотларига кўра, заводни ишга тушириш 2025 йилнинг тўртинчи чорагига мўлжалланган. “Altynalmas Reagents” корхонаси Чу шаҳридаги “Кимёпарк Тараз” эркин иқтисодий зонасида жойлашган. 

“Ишлаб чиқариш қуввати – 25 минг тонна натрий цианид – бу бугунги кунда олтин қазиб олиш саноати учун асосий ва ажралмас кимёвий реагентдир. Ишлаб чиқарилган маҳсулот олтин гидрометаллургияда ишлатиладиган энг юқори сифатли натрий цианидидир, тозалиги камида 98%”, дея изоҳ берди вазирлик. 

Янги корхонада кимё ишлаб чиқариш соҳасида жаҳон етакчиси Chemours (собиқ DuPont) компаниясининг лицензияланган технологиясидан фойдаланиш режалаштирилмоқда.  

“Лойиҳалаш ва қурилиш ишлари Германиянинг етакчи инжениринг компанияси Glatt Gmbh томонидан амалга оширилмоқда. У илгари дунёда иккита ана шундай лойиҳани муваффақиятли йўлга қўйган. Корхонада энг яхши илғор технологиялар ва замонавий меҳнатни муҳофаза қилиш ва экологик стандартлар жорий этилади. Масалан, лойиҳа атроф-муҳитга нол чиқиндилар билан технологик сув айланишининг бутунлай ёпиқ циклини, қайта ишланган газларнинг экологик хавфсиз фавқулодда ёниш тизимини назарда тутади”, дея қўшимча қилди матбуот хизмати.