Қорақалпоғистон, Хоразм ва Андижонда мансабдорлар пора билан қўлга тушди (видео)

Қорақалпоғистон Республикаси, Хоразм ва Андижон вилоятларида Давлат хавфсизлик хизмати ходимлари томонидан бошқа ҳуқуқни муҳофаза қилувчи идоралар билан ҳамкорликда жойларда ўтказилган тезкор тадбирлар давомида бир нечта қонунбузилиши ҳолатларига чек қўйилди. Бу ҳақда Давлат хавфсизлик хизмати хабар берди.

Жумладан, Андижон вилояти фавқулодда вазиятлар бошқармасининг туман бўлими бошлиғи бино ва иншоотларга ёнғинга қарши жиҳозларни ўрнатиш билан шуғулланувчи масъулияти чекланган жамият томонидан тумандаги ижтимоий соҳа объектларининг бино ва иншоотлари ёғоч қисмларига ёнғин хусусиятини сусайтирувчи махсус суюқлик эритмаси билан ишлов берилганлиги тўғрисидаги далолатномаларни тасдиқлаб бериш эвазига, ўзининг хизмат хонасида 7 млн 300 минг сўм олган вақтида ашёвий далиллар билан ушланди. 

Қорақалпоғистон Республикасида кузатилган ҳолатда, Нукус шаҳар фавқулодда вазиятлар бўлимининг мансабдор ходими аҳоли ва тадбиркорлик субъектларига ёнғин хавфсизлигини таъминлаш бўйича техник хизмат кўрсатувчи масъулияти чекланган жамият ташкил этмоқчи бўлган фуқарога келгусида унинг фаолиятига раҳнамолик қилишини айтиб, эвазига ҳар ойда 200 АҚШ доллари миқдорида пул беришини талаб қилади. Аммо, у "холис хизмати" учун олдиндан 4 млн сўм олган вақтида ушланди. 

Ўзбекистон Республикаси Савдо-саноат палатаси Хоразм вилояти бошқармасининг шаҳар бўлими бошлиғи оилавий корхонанинг мавжуд кредит қарздорлигини тижорат банкнинг “Марказлаштирилган кредит тарихи” ахборот маркази базасидан ўчиртириб, ушбу банкдан 100 млн сўм миқдорида имтиёзли кредит олиб бериш эвазига 1500 АҚШ доллари талаб қилиб, олдиндан 10 млн сўм олган вақтида ашёвий далиллар билан ушланди. Таъкидлаш лозимки, мазкур мансабдор шахс муқаддам судланган бўлсада, ўз хатосидан тўғри хулоса чиқармаган. 

Бошқа ҳолатда эса Андижон вилояти Экология, атроф-муҳитни муҳофаза қилиш ва иқлим ўзгариши бошқармасининг Асака туман бўлими бош инспектори муқаддам судланганлигига қарамасдан, 2021 йилда туман ҳокимининг қарори билан Ёшлар саноат зонаси ҳудудидан ўзининг қариндошига синтепон маҳсулоти ишлаб чиқариш фаолияти билан шуғулланиш мақсадида 30 йил муддатга ижара асосида ажратилган 5 сотих ер майдонини тадбиркорлик билан шуғулланмоқчи бўлган фуқаро номига расмийлаштириб бериш эвазига 20 минг АҚШ доллари олган вақтида ушланди.

Хоразм вилояти Қурилиш ва уй-жой коммунал хўжалиги бош бошқармаси Урганч шаҳар бўлимининг бош мутахассиси 470 м² ер майдонида кўп қаватли уй қуришга рухсат берувчи ҳужжатларни расмийлаштириб, қурилиш ишларига нисбатан аҳолининг розилиги бўйича далолатномаларни тайёрлаб бериш эвазига 30 млн сўм талаб қилади. Лекин, бош мутахассис сўралган пул маблағидан 20 млн сўмни олган вақтида ушланди. 

Шунингдек, терговга қадар текширув давомида ушбу ноқонуний ишга вилоят Қурилиш ва уй-жой коммунал хўжалиги бош бошқармасининг Урганч шаҳар бўлими бошлиғи ўринбосари ҳам алоқадор эканлиги аниқланди.

Ҳозирда мазкур шахсларнинг барчасига нисбатан жиноят ишлари қўзғатилиб, тергов ҳаракатлари олиб борилмоқда.

Эслатиб ўтамиз, олдинроқ Қашқадарё, Навоий, Андижон ва Сирдарё вилоятларида бир неча туман ҳокимларининг ўринбосарлари ва ёрдамчилари пора билан қўлга тушганди. Тошкент вилояти Чирчиқ шаҳар ҳокимининг ўринбосари хизмат мавқеидан фойдаланган ҳолда 1 млн АҚШ доллари пора олаётган вақтида қўлга олинди.