Қоғоз баённома тузиш бекор қилингани учун коррупция омиллари кескин камайди – Мирзиёев

“Қўл радари” ва қоғоз баённома тузиш бекор қилингани учун коррупция омиллари кескин камайган. Бу ҳақда Президент Шавкат Мирзиёев бугун, 5 март куни Сенатда ўтаётган йиғилишда сўз очди.

Қайд этилишича, йўл ҳаракати хавфсизлиги инспекторлари боди-камера билан хизмат ўтаётгани, авторақамлар аукционда сотилаётгани, “қўл радари” ва қоғоз баённома тузиш бекор қилингани учун коррупция омиллари кескин камайган.

Аҳоли ва тадбиркорларга “халқ хизматидаги давлат” тамойили асосида хизмат кўрсатиш йўлга қўйилган. Хусусан, 120 турдаги ҳужжатларни талаб қилиш, 160 дан ортиқ лицензия ва рухсатномалар бекор қилинган.

Натижада 200 мингга яқин янги тадбиркорлар бозорга кириб келган. Чет эл иштирокидаги корхоналар қарийб 5 карра ошиб, 23 мингга яқинлашган. Электрон давлат хизматлари сони 15 карра ортиб, 721 тага етган, улардан фойдаланувчилар эса 11 миллиондан ошган.

“Олдинги 25 йил давомида бу тушунчалар бизга ёт эди. Кўриб кўрмасликка олинарди. Буларнинг ҳеч бири ўзидан-ўзи бўлгани йўқ. Ҳаммасига машаққатли меҳнатимиз билан эришдик. Энг муҳими – буларнинг ҳисобига аҳоли, тадбиркорлар, хорижий ҳамкорларимиз, халқаро ташкилотлар ва инвесторларнинг ислоҳотларимизга ишончи мустаҳкамланди. Сўнгги етти йилда 120 миллиард доллардан ортиқ инвестиция киргани, иқтисодиётимиз 2 карра ўсиб, ўтган йили 115 миллиард долларга етгани бунинг яққол исботи эмасми? Барчамиз яхши тушунамиз, коррупцияга қарши кураш жараёни ҳеч қачон аниқ муддат билан чекланмайди. Ушбу масалада фақат давлатнинг саъй-ҳаракати билан кутилган натижага эришиб бўлмайди. Бу – бутун жамиятимизнинг иши”, деди Президент.

Шунингдек, кадрларда фидойилик, иллатларга қарши курашишда ҳамжиҳатлик етишмаётгани бу борадаги энг катта камчилик сифатида кўрсатиб ўтилди.

Мамлакатдаги тинчлик ва барқарорликни қадрлаш, кечаги кун билан бугунги куннинг фарқини яхши тушуниш, маҳаллада, тўй-маракада ортиқча исрофгарчиликка йўл қўймаслик, ҳалоллик ва шукроналик билан ҳаёт кечиришни тушунтириш ишлари бўйича жамиятимизда яхши тажрибалар етишмаслиги қайд этилди.

Давлат раҳбари бу борада турган энг муҳим вазифаларга тўхталиб ўтди.

Эслатиб ўтамиз, аввалроқ Президент жамиятда коррупция муаммосини жамоатчилик муҳокамасига олиб чиқадиган очиқ тизим, очиқ муҳит яратилгани, айниқса, оммавий ахборот воситаларининг бу борадаги ўрни ва таъсири ортиб бораётганини, илгари бу мавзу журналистлар учун мутлақо ёпиқ бўлгани, ҳозир эса мавжуд ҳолат очиқлик ва шаффофлик томонга бутунлай ўзгарганини айтганди. Очиқлик бўйича халқаро рейтингларда мамлакатимизнинг ўрни 138 поғонага яхшиланиб, Марказий Осиёда биринчи, дунёда 30-ўринга кўтарилди.