Қирғизистон президентлигига собиқ номзод қамоқда очлик эълон қилди

Қирғизистон президентлигига собиқ номзод, тадбиркор ва хайриячи Имомидин Тошов 1-сонли тергов изолятори маъмуриятининг босимига норозилик сифатида очлик эълон қилди. Бу ҳақда унинг адвокати Асал Арғимбоева маълум қилди.

Унинг сўзларига кўра, Имомидин Тошов ҳибсда сақлаш шароитлари бузилгани юзасидан Бош прокуратура, Омбудсман, Жазони ижро этиш давлат хизмати ва бошқа идораларга ариза билан мурожаат қилганидан кейин таъқибга учраган.

“Менинг мижозим олти кишига мўлжалланган 235-камерадан 18 нафар, жумладан, бир неча марта қотиллик содир этганликда айбланган маҳкумлар истиқомат қиладиган 218-камерага тўла-тўкис ўтказилган. Ундан қариндошлари томонидан сотиб олинган ва совға қилинган шахсий буюмлари тортиб олинган”, дейди Асал Арғимбоева.

Адвокатнинг таъкидлашича, бундай ҳаракатлар Қирғизистоннинг “Қамоққа олиш тартиби ва шартлари тўғрисида”ги қонунига зиддир. Хусусан, қонуннинг 22-моддаси 7-қисмида гумон қилинувчи шахсларни шикоят ва апелляциялар берганлик учун жавобгарликка тортиш тақиқланган.

Воқеа юзасидан аллақачон 1-сонли тергов изолятори ходимларига нисбатан жиноий иш қўзғатилган.

Асал Арғимбоева Имомидин Тошовнинг соғлиғи нафақат озиқ-овқат, балки сувдан ҳам бош тортгани туфайли тез ёмонлашиши мумкинлигини таъкидлаб, юзага келиши мумкин бўлган оқибатлар учун жавобгарликни жазони ижро этиш тизими раҳбариятига юклади.

Имомидин Тошов ўтган йилнинг апрель ойида Чуй вилоятининг Қайнди қишлоғида қўлга олинган эди. Миллий хавфсизлик давлат қўмитаси маълумотларига кўра, у норозилик намойиши учун кучларни бирлаштириш ва кейинчалик ҳокимиятни қўлга киритиш учун Қора-Болта шаҳрида вақтинчалик штаб ташкил этишни режалаштирган.

Эслатиб ўтамиз, аввалроқ Боливиянинг собиқ президенти Эво Моралес ўз тарафдорларидан йўлларни тўсиб қўйиш тўхтатишни сўраганди, бироқ ҳукумат музокаралар ўтказмагунча очлик эълон қилди.