Қатар ЖЧдаги иштирокини якунлади

Бугун, 25 июн куни Қатар терма жамоаси Жаҳон чемпионати гуруҳ босқичининг учинчи турида Босния ва Герцеговинага 1:3 ҳисобида мағлуб бўлди. Шу тариқа, осиёликлар мундиалдаги иштирокини якунлади.

Сиэтл шаҳрида бўлиб ўтган учрашувдан сўнг Қатарнинг плей-офф босқичига чиқиш имконияти барҳам топди.

Босния ва Герцеговина сафида Керим-Сам Алайбегович 29-дақиқада, Эрмин Махмич эса 80-дақиқада гол урди. Қатарлик Махмуд Абунада 34-дақиқада ўз дарвозасига тўп киритди. Қатарнинг ягона голига Ҳасан Ал-Ҳайдос 42-дақиқада муаллифлик қилди.

Ўйинда киритилган голларни ушбу ҳавола орқали томоша қилишингиз мумкин.

Босния ва Герцеговина 4 очко билан “Б” гуруҳида учинчи ўринни эгаллади ва плей-оффга чиқиш имкониятини сақлаб қолди. Қатар 1 очко билан тўртинчи поғонада қолди ҳамда мусобақани тарк этди.

Швейцария 7 очко билан гуруҳ ғолиби бўлди, Канада эса 4 очко жамғариб, иккинчи ўриндан плей-офф йўлланмасини қўлга киритди.

Маълумот учун, Жаҳон чемпионати АҚШ, Канада ва Мексика мезбонлигида ўтказилмоқда. Илк бор 48 та жамоа иштирок этаётган мусобақа жорий йилнинг 19 июль куни якунланади. Ҳар бир гуруҳда дастлабки икки ўринни эгаллаган жамоалар, шунингдек, учинчи ўринни банд этган жамоалар орасидаги энг яхши саккизта терма жамоа плей-офф босқичига йўл олади. Аргентина амалдаги жаҳон чемпиони ҳисобланади.