Қашқадарёда ўқувчилар бир-бирига бўёқ сепди (видео)

Ижтимоий тармоқларда Қашқадарё вилоятидаги мактабда ўқувчилар бир-бирига бўёқ сепгани акс этган видео тарқалди. Ҳолат юзасидан вилоят Мактабгача ва мактаб таълими бошқармаси муносабат билдирди. 

Маълум қилинишича, ҳолат жорий йилнинг 12 май куни Чироқчи туманидаги 82-сонли мактабнинг 8-10-синф ўқувчилари ўртасида содир этилган. Танаффусда ўқувчилар ўзаро бўёқ лакларини бир-бирига сепиш, мактаб деворига таъсир этганлик ҳолати кузатилган. Мактаб маъмуриятига кўра, мазкур ҳолатни келтириб чиқарган ўқувчиларнинг ота-оналарига нисбатан ҳуқуқ-тартибот органлари томонидан маъмурий баённома расмийлаштирилган.

“Аслида видеолавҳа ота-оналарни фарзанд тарбиясига эътиборли бўлиш мақсадида мактабнинг ўқув ишлари бўйича директор ўринбосари томонидан тасвирга олиниб, уларга юборилган. Бундан эса ижтимоий тармоқларда нотўғри талқин қилинишга уринилган”, дейилади хабарда.

Шунингдек, таълим ташкилотининг мулки, моддий-техник базасига зиён етказиш ҳолатлари ғайриқонуний ҳаракат ҳисобланишини инобатга олиб, ўз навбатида эътиборсизлик ҳолатларини юзага келтирган синф раҳбарлари, мактаб маъмуриятига нисбатан таъсир чораси қўлланган.

Эслатиб ўтамиз, аввалроқ Навоий вилоятининг Хатирчи туманидаги мактаб директори ўқувчиларни калтаклаганди.