Qashqadaryoda dahshatli YTH: yuk mashinasi 9 ta avtomobil bilan to‘qnashdi (video)

Kecha, 3 iyul kuni Qashqadaryo viloyatining Shahrisabz tumanida HOWO rusumli yuk avtomobili va 9 ta yengil avtomobil ishtirokida yo‘l-transport hodisasi sodir bo‘ldi. Bu haqda Qashqadaryo viloyati IIB YHXB xabar berdi.

Ma’lum qilinishicha, hodisa soat 14:30 larda Shahrisabz tumanidagi avtomobil yo‘lining 22-kilometrida HOWO rusumli yuk avtomobilining tormoz tizimida yuzaga kelgan nosozlik sabab sodir bo‘lgan. Oqibatda yuk avtomobili o‘zi bilan bir yo‘nalishda harakatlanayotgan jami 9 ta transport vositasi – 2 ta Lacetti, Tracker-2, Nexia-1, Nexia-3, Matiz, Damas va Spark bilan to‘qnashib, yo‘l-transport hodisasini keltirib chiqargan. To‘qnashuvdan so‘ng Nexia-1 haydovchisi yo‘l chetidagi piyodani urib yuborgan.

Piyodaga shifokorlar tomonidan birinchi tibbiy yordam ko‘rsatilgan.

Bildirilishicha, holat yuzasidan Qashqadaryo viloyati IIB YHXB mas’ul xodimlari tomonidan surishtiruv ishlari olib borilmoqda.

Eslatib o‘tamiz, avvalroq Toshkent shahrida Malibu avtomobili tezlikni oshirishi oqibatida qahvaxonaga urilib, ag‘darilib ketgan edi.