Қамалган президент шифохонага ётқизилди

Бразилиянинг собиқ президенти Жаир Болсонару кеча, 16 сентябрь куни ўзини ёмон ҳис қилгандан сўнг шифохонага ётқизилди. Бу ҳақда унинг катта ўғли, сенатор Флавио Болсонару X ижтимоий тармоғида маълум қилди.

Собиқ давлат раҳбарида кучли ҳиқичоқ, қусиш ва қон босимининг пасайиши кузатилгани айтилмоқда.

“Ҳеч қандай жиддий нарса бўлмаслиги учун барчадан дуо сўрайман”, деди кичик Болсонару.

Собиқ биринчи хоним Мишель Болсонару эса турмуш ўртоғи бир қатор текширувлардан ўтгани ва ҳозирда дори-дармонлар олаётганини маълум қилди. 

“Ҳаммаси яхши бўлади!”, деб ёзди у Instagram’да.

Бу хабар собиқ президентнинг давлат тўнтариши уюштиришда айбдор деб топилиб, ҳукм чиқарилганидан бир ҳафта ҳам ўтмай келди. Прокурорларнинг айтишича, Болсонарунинг режалари орасида амалдаги президент Луис Инасиу Лула да Силвани суиқасд орқали йўқ қилиш ҳам бўлган.

70 ёшли Болсонару 27 йилдан ортиқ муддатга қамоққа ҳукм қилинган. У ўзини айбсиз деб ҳисоблайди.

Ўта ўнгчи сиёсатчи етти йил олдин сайловолди тарғибот пайтида пичоқланиб, олган жароҳатидан келиб чиққан оғриқ сабабли аввал ҳам шифохонага тушган. Сўнгги марта шифохонага ётқизилиши ана шу ҳодиса билан боғлиқ-ми ёки йўқ, ҳали аниқ эмас.

14 сентябрь куни Болсонару қатор тиббий текширувлардан ўтган ва терисидаги яллиғланган тошмаларни олиб ташлаш учун тиббий амалиёт ўтказгани ҳам хабар қилинган. Август ойидан бери Болсонару уй қамоғида – суд жараёни давом этаркан, унга қатор чекловлар қўйилган, жумладан ижтимоий тармоқлар ва мобил телефондан фойдаланиш тақиқланган.