Италияда 40 йилдаги энг кучли зилзила содир бўлди 

Кеча, 31 июль куни Италия жанубида – Неаполь ва унинг атрофида 4,7 магнитудали ер силкиниши содир бўлди. Оқибатда камида 21 киши жароҳатланди. Бу ҳақда “Corriere Del Mezzogiorno” хабар берди.

“Ҳозирга келиб жароҳатланганлар сони 21 кишини ташкил этмоқда, улардан икки нафари оғир аҳволда”, дейилади хабарда.

Миллий геофизика ва вулканология институти маълумотларига кўра, ер силкиниши бутун шаҳар ва унинг атрофида, айниқса, эпицентр жойлашган Флегрей майдонлари ҳудудида – Неаполдан 6 км узоқликда аниқ сезилган.

Зилзила маҳаллий вақт билан соат 19:46 да содир бўлган. Бу Поццуоли ҳудудида сўнгги 40 йил ичида – бу ерда брадисейсмик фаоллик (ер пўстининг секин кўтарилиши ёки чўкиши) қайта бошланганидан бери қайд этилган энг кучли силкинишдир. Маҳаллий вақт билан соат 22:00 атрофида яна бир кучсизроқ – 3,8 магнитудали силкиниш юз берган.

Тураржой биноларига шикаст етган, шунингдек, юқори кучланишли электр устуни қисман қулаб тушган, бунинг оқибатида Фуоригрота ва Баньоли туманлари электрсиз қолган. Бундан ташқари, поездлар ҳаракати вақтинча тўхтатилган.

Сольфатара вулқони ҳудудида тоғ тизмасининг бир қисми ўпирилиб тушган. Поццуоли порти унга олиб борувчи йўлларда ёриқлар пайдо бўлгани сабабли ёпилган. Ҳокимият органлари ёрдам кўрсатиш пунктларини ташкил этган, аҳолига сув ва энг зарур буюмлар тарқатилмоқда.

Эслатиб ўтамиз, аввалроқ Япониянинг жанубидаги Кумамото префектурасида 7,1 магнитудали зилзила содир бўлганди. Зилзила ортидан мамлакатнинг жанубидаги Кюсю ороли ҳудудлари учун цунами ва фавқулодда огоҳлантиришлар эълон қилинган.