Италия россиялик паралимпиячиларга виза беришдан бош тортмоқчи – ОАВ

Италия ташқи ишлар вазири ва бош вазир ўринбосари Антонио Таяни россиялик паралимпиячиларга ва улар билан ҳамроҳлик қилаётган шахсларга виза бермасликни таклиф қилди. Бу ҳақда “La Repubblica” нашри хабар берди.

Мазкур масала Вазирлар Кенгаши йиғилишида муҳокама қилинган. Таяни Италия спорт вазири Андреа Абоди билан ёпиқ учрашув ўтказган. Шундан сўнг Халқаро Паралимпия Қўмитасининг россиялик спортчиларга мусобақаларда байроқ ва мадҳия билан қатнашишга рухсат бериш қарори танқид қилинган расмий баёнот эълон қилинган.

Италия қишлоқ хўжалиги вазири Франческо Лоллобриджида эса ҳар қандай камситишдан қочиш зарурлигини таъкидлади.

Маълумот учун, 2022 йил март ойида Халқаро Олимпия Қўмитаси халқаро федерацияларга Россия ва Беларусь спортчиларини мусобақалардан четлаштиришни тавсия қилган эди. 2023 йил декабрь ойида эса ташкилот россиялик спортчиларга 2024 йилги Париж Олимпия ўйинларида нейтрал мақомда иштирок этишга рухсат беришни тавсия қилган.

Эслатиб ўтамиз, аввалроқ Украина Спорт вазири Матвей Бедний мамлакат расмийлари келаси ой ўтадиган Милан–Кортина Паралимпиадаси очилиш маросими ва мусобақаларини бойкот қилишини маълум қилганди.