Исроилга ҳужум АҚШ гегемониясига барҳам берди – “Bloomberg”

ҲАМАСнинг Исроилга ҳужуми АҚШ гегемонлигига барҳам берилганининг далолатидир. Бу ҳақда Bloomberg шарҳловчиси Ҳэл Брэндс ёзмоқда.

Журналистнинг фикрича, Исроилдаги можаронинг таранглашуви глобал хавфсизлик инқирози кучайиб бораётганининг аломатларидан биридир. Брэндснинг эслатишича, бир неча ҳафта олдин АҚШ миллий хавфсизлик бўйича маслаҳатчиси Жек Салливан минтақада сўнгги йигирма йил ичида кузатилмаган тинчлик ҳақида гапирган эди.

Брэндс, шунингдек, АҚШ ва унинг иттифоқчилари "ҳал қилувчи устунликка" эга бўлган Pax Americana даври тугаётганини билдирган.

Бунгача Россия ташқи ишлар вазири Сергей Лавров АҚШнинг Фаластин ва Исроил ўртасидаги можарони ҳал қилиш бўйича воситачилик саъй-ҳаракатларини монополлаштиришга уриниш, деб атаган эди.

АҚШ Вакиллар палатасининг собиқ спикери Кевин Маккарти ҳам ҲАМАСнинг бостириб киришини Вашингтон учун ҳам “муваффақиятсизлик” деган. Унинг фикрича, Қўшма Штатлар ҳужумда иштирок этиши мумкин бўлган Эронга босимни “максималлаштириши” керак.

Аввалроқ, Чеченистон раҳбари Рамзан Қодиров Фаластинга ўз бўлинмаларини юборишга тайёр эканини айтганди.

Эслатиб ўтамиз,  жорий йилнинг 7 октябрь куни эрталаб Ғазо секторидан Исроил ҳудудига ракета ҳужуми бошланганди. Кейинчалик ҲАМАС ҳаракати Исроилга қарши “Ал-Ақсо тўфони” ҳарбий операцияси бошлаганини эълон қилди. Исроил Мудофаа кучлари эса бунга жавобан “Темир қиличлар” “аксилтеррор операцияси”ни бошлади.

Шундан сўнг, Бош вазир Биньямин Нетаньяху исроилликларга мурожаат билан чиқиб, мамлакатда содир бўлаётган воқеалар ҳарбий операция эмас, балки тўлақонли уруш эканини айтди. 

Бу орада Америка Қўшма Штатлари Ғазо сектори атрофидаги кескинлик фонида “Эронни жиловлаш учун” Яқин Шарққа қўшимча 20-25 та F-35 ва F-15 қирувчи самолётларини юбориши маълум бўлди. Германия эса Фаластин ҳудудларидаги гуманитар лойиҳалар учун аввал тасдиқланган маблағларни ажратишни тўхтатди.