Исроилда эркак машинасини одамлар устига ҳайдади

Исроилда Пардес-Хана-Каркур чорраҳасида эркак автомобилини автобус бекатида турган пиёдалар устига ҳайдади. Ҳодиса оқибатида 10 киши жароҳат олди, камида бир киши оғир аҳволда, икки киши эса жиддий жароҳатланган. Бу ҳақда “Channel 12” телеканали хабар берди.

Қайд этилишича, полиция воқеани эҳтимолий террорчилик ҳужуми сифатида ўрганмоқда.

“Жиноий шахс автобус бекатида турган одамлар устига машинасини ҳайдаб борди, сўнг полиция машинасига урилди. Машинадан тушиб, ҳуқуқ-тартибот органлари ходимларига ҳужум қилди ва ўлдирилди”, дейилади хабарда.

Дастлаб ҳодиса айбдори 24 ёшли араб миллатига мансуб исроиллик экани хабар қилинганди. Бироқ кейинчалик, “Channel 12” телеканали эркакнинг 50 ёшли Ғарбий Соҳилдан келган фаластинлик экани, у исроилликка уйланган ва бир неча йилдан бери Исроилда яшаганини аниқлаган.

Эслатиб ўтамиз, аввалроқ Исроилнинг Тель-Авив шаҳри Бат-Ям муниципалитетидаги автотураргоҳда иккита бўш автобус портлаб кетган эди. Полиция ушбу ҳодисани террорчилик ҳужумига уриниш деб ҳисоблаган. Портлашлардан сўнг Бат-Ямда темирйўл транспорти ҳаракати тўхтатилган. Исроил Транспорт вазири Мири Регев барча автобуслар, поездлар ва темирйўл транспортини тўхтатиб, текшириш, Шабак (Исроил хавфсизлик хизмати) ва полиция кўрсатмаларига мувофиқ ҳаракат қилишни буюрган.