Исроилда армия генераллари ишдан бўшатилди

Исроил армиясининг (ЦАХАЛ) уч нафар генерали ва ўнлаб юқори мартабали қўмондонлари 2023 йил 7 октябрь куни ҲАМАС томонидан амалга оширилган ҳужумнинг олди олинмагани учун ишдан бўшатилди. Бош штаб бошлиғи генерал-лейтенант Эяль Замирнинг қарорига кўра, улар нафақат лавозимидан озод қилинган, балки армиянинг захира таркибидан ҳам чиқариб юборилади. Бу ҳақда кеча, 24 ноябрь куни “Reuters” хабар берди.

Қайд этилишича, бўшатилганлар ЦАХАЛнинг собиқ разведка бошлиғи Аҳарон Халива, собиқ оператив бошқарма раҳбари Одед Басюк, ўша пайтда жанубий ҳарбий округга масъул бўлган генерал-майор Ярон Финкелман.

Финкелман ва Халива 2025 йил январида ўз хатолари сабаб истеъфога чиққан эди. Басюк эса Исроил–Эрон уруши тугагач, лавозимини тарк этган.

Бунга қўшимча равишда Исроил ҳарбий-ҳаво кучлари қўмондони Томер Барга ҳам интизомий чора қўлланилди. Яна тўққиз генерал ва юқори мартабали офицерлар жавобгарликка тортилди.

Олдинги Бош штаб бошлиғи Герзи Халеви март ойида истеъфога чиқиб, 7 октябрдаги ҳарбий хатолар учун шахсий жавобгарликни ўз зиммасига олган эди. Унинг ўрнига тайинланган Эяль Замир қўмондонларнинг фаолиятини қайта баҳолашни буюрган.

Ушбу ишдан бўшатишлар ноябрь бошида эълон қилинган экспертлар ҳисоботидан кейин амалга оширилди. Ҳисоботда Исроил армиясининг кўплаб йиллик стратегик ва тактик хатолари кескин танқид қилинган. Хусусан:

• 7 октябрга ўтар кечаси қўшинларнинг нотўғри жойлаштирилгани,
• қўмондонлик занжиридаги жиддий бузилишлар,
• разведканинг йирик ҳужум ҳақида ўз вақтида огоҳлантира олмагани.

Ҳисоботда, шунингдек, стратегик ва оператив вазият билан Исроил армиясининг Ғазо бўйича “вазиятни идрок этиши” ўртасида катта тафовут бўлгани айтилади. ҲАМАСнинг катта ҳужумга ҳозирлигига доир аниқ маълумотлар бўлса-да, у эътиборга олинмаган.

Мудофаа вазири Исроил Кац ҳисобот бўйича синчков текширув бошлаганини эълон қилди. Маҳаллий ОАВга кўра, у генераллар ишдан бўшатилгани ҳақида матбуотдан билиб, бундан қаттиқ норозилик билдирган. Замир эса бундай танқидни тушунарсиз деб атаган.

AFP агентлигининг қайд этишича, Кац ва Замир ўртасида сўнгги вақтларда кескинлик кучайган – бунинг сабаби Замирнинг 7 октябрь воқеалари бўйича тизимли тергов талаб қилиб, ҳукуматдан очиқчасига узоқлашганидир.

Эслатиб ўтамиз, аввалроқ Исроил “Ҳизбуллоҳ” ҳарбий раҳбарини ўлдирганди.