Исроилда 17 ёшли футболчи 99 йилга дисквалификация қилинди

Исроил чемпионатининг учинчи дивизионида иштирок этувчи “Йермиягу Холон” жамоасининг 17 ёшли футболчиси иккинчи марта шиддатли муштлашувга қўл урганлиги сабабли Исроил футбол ассоциацияси уни 99 йилга майдондан четлатди. Бу ҳақда “One” нашри хабар берди.

Бу воқеа олдидан ҳам ушбу футболчи шиддатли ҳаракатлари билан танилган бўлиб, аввал ҳам рақиб жамоа футболчисига ҳужум қилгани учун 6 ўйинлик дисквалификация олган эди. Шу билан бирга, у бир имкониятга эга бўлиб, хатти-ҳаракатларини яхшилаши учун огоҳлантирилган эди. Бироқ, сўнгги муштлашувдан сўнг ассоциация трибунали уни доимий равишда майдондан четлатишга қарор қилди. 

 “Айбланувчи илгари олинган интизомий чоралардан сабоқ чиқармади ва ўз хатти-ҳаракатини кучайтирди. Шу сабабли, унинг майдонда бошқа имконияти йўқ ва у фаол футболчи сифатида ўйнай олмайди. Шунинг учун, уни доимий равишда майдондан четлатишга қарор қилинди”, дейилади суд қарорида.

Бу ҳолат Исроил футболи тарихида жуда кам учрайдиган воқеа сифатида қайд этилмоқда. Натижада, футболчи 99 йилга дисквалификация қилинди ва фақат 2124 йил ноябрида майдонга қайтиш ҳуқуқига эга бўлади.

Шунингдек, футболчи ўз жамоаси билан биргаликда 2500 шекел (тахминан 777 доллар) миқдорида жаримага тортилди. Жамоа, шунингдек, тартибсизлик ва бошқа интизомий ҳолатлар бўйича шартли жазога учради.

Эслатиб ўтамиз, аввалроқ ўзбекистонлик боксчи Лазизбек Мулложоновда тақиқланган модда аниқлангани сабабли спортчи 3 йил муддатга мусобақалардан четлаштирилганини расман маълум қилинган эди.