Исроил ҳукумати Рафаҳга ҳужум қилиш режасини тасдиқлади

Исроил ҳарбий Вазирлар Маҳкамаси беш ойлик урушдан кейин Фаластин анклавининг 2,3 миллион аҳолисининг ярмидан кўпи бошпана олаётган Ғазо сектори жанубидаги Рафаҳ шаҳрига ҳужум қилиш режасини маъқуллади. Бу ҳақда Бош вазир Биньямин Нетаньяхунинг идораси хабар берди. 

Халқаро иттифоқчилар тинч аҳолининг кенг миқёсда қурбон бўлишидан қўрқиб, Нетаньяхуни Рафаҳга ҳужум қилишдан тийилишга чақирганди. Бироқ Исроил бу ер ҲАМАСнинг сўнгги таянч нуқталаридан бири эканини даъво қилмоқда. Шунингдек, Исроил маҳаллий аҳоли эвакуация қилинишига ваъда берган.

Оқ уй Миллий хавфсизлик кенгаши сўзловчиси Жон Кирбининг айтишича, Қўшма Штатлар Рафаҳ режасини кўрмаган, лекин уни кўришни хоҳлайди. Кирби ҲАМАСнинг гаровга олинганларни озод қилиш эвазига ўт очишни тўхтатиш таклифи эҳтимолий вариантлар доирасида эканини қўшимча қилди.

“Reuters” агентлигининг хабар беришича, ҲАМАС воситачилар ва Қўшма Штатларга ўт очишни тўхтатиш бўйича таклифни тақдим этган бўлиб, у исроиллик гаровга олинганларни озод қилиш эвазига фаластинлик маҳбуслар, жумладан 100 нафар умрбод қамоқ жазосини ўтаётганлар озод қилинишини назарда тутади.

Нетаньяху идорасининг Рафаҳ ҳужуми режасига оид баёнотида ҲАМАСнинг гаровга олинганларни озод қилиш талаблари реал эмаслиги, аммо Исроил делегациясининг музокаралар учун Доҳага бориши таъкидланган.

Исроил баёнотида айтилишича, ЦАХАЛ Рафаҳда “операция ва аҳолини эвакуация қилишга тайёрланмоқда”. Ҳужжатда муддат белгиланмаган ва жойларда қўшимча тайёргарлик кўрилгани ҳақида ҳеч қандай далил йўқ.

АҚШ Давлат котиби Энтони Блинкеннинг айтишича, АҚШ Исроилдан Рафаҳ учун аниқ ва амалга оширилиши мумкин бўлган режани тақдим этишини хоҳлайди.

Эслатиб ўтамиз, 12 февралга ўтар кечаси Исроил Қуролли кучлари Рафаҳга йирик зарбалар берганди. Портлашлар оқибатида 100 киши ҳалок бўлган, 230 дан ортиқ киши жароҳатланганди. АҚШ Президенти Жо Байден эса Исроил Бош вазири Биньямин Нетаньяху билан телефон суҳбатида тинч аҳолини ҳимоя қилиш бўйича аниқ режаларсиз Рафаҳ шаҳрида ҳарбий операция ўтказмасликни тавсия қилди. Нетаньяху CBC News телеканалига берган интервьюсида Исроил ва ҲАМАС ўртасида маҳбуслар алмашинуви бўйича келишувга эришилса, Исроилнинг Рафаҳ шаҳрига ҳужуми "кейинга сурилиши" мумкинлигини айтди. 25 февраль куни кечқурун Исроил армияси ҳарбий Вазирлар Маҳкамасига Рафаҳ шаҳрига ҳужум қилиш режасини тақдим этди.