Исроил Кац Ғазога ҳужумлар кенгайтирилганини эълон қилди 

Исроил Мудофаа вазири Исроил Кац Ғазо секторидаги ҳужумлар кенгайгани ҳақида хабар берди. Бу ҳақда у Х ижтимоий тармоқда ёзди.

Ғазо секторидаги ҳужумларнинг кенгайиши ҲАМАС ва Ғазо халқига босимни оширишини таъкидлаган Кац бу ҳудудлар Исроилнинг "хавфсизлик зонаси"га киритилишини айтди.

Исроил давлат телевидениеси КАН армия бугун, 2 апрель куни эрталаб Ғазо сектори жанубидаги Рафаҳ шаҳрига қуруқликдан ҳужум уюштирганини эълон қилди.

Хабарларга кўра, тун бўйи давом этган шиддатли ҳаво ҳужумларидан сўнг, қўшин биринчи марта минтақага кирган ва оташкесим бузилганидан бери қуруқлик ҳужумларини бошлаган.

Исроил армиясининг жанубий қўмондонликда ишғолни кенгайтиришга тайёргарлик кўрган энг йирик бўлинмаси ҳисобланган зирҳли техника ва танклардан ташкил топган 36-дивизиянинг Ғазо жанубига киргани маълум қилинди.

Маълумот учун, 19 январь куни Ғазо секторида кучга кирган ўт очишни тўхтатиш келишувидан сўнг Исроил армияси 18 март куни эрталаб ўзининг шафқатсиз ҳужумларини давом эттирди. Ғазода Фаластин Соғлиқни сақлаш вазирлигининг сўнгги баёнотига кўра, Исроил армияси ҳужумларни қайта бошлаганидан бери 1042 нафардан кўпроқ фаластинлик ҳалок бўлди.

2023 йил 7 октябрдан бери Исроилнинг Ғазо секторига уюштирган ҳужумларида ҳалок бўлган фаластинликлар сони 50 минг 399 нафарга, яраланганлар сони эса 114 минг 583 нафарга етди.