Исроил Ғарбий Соҳилдаги тўрт шаҳарда кенг кўламли операция бошлади

Исроил хавфсизлик кучлари босиб олинган Ғарбий Соҳил шимолида кенг кўламли операция ўтказмоқда. Ҳарбий ҳаракатлар Фаластиннинг тўртта шаҳрида – Женин, Тулкарм, Наблус ва Тубасда кузатилмоқда. Исроил ҳарбий амалиёти оқибатида камида 11 фаластинлик ҳалок бўлган. Бу ҳақда Фаластин расмийларига таяниб, BBC хабар берди.

Ал-Фара қочқинлар лагерига берилган ҳаво ҳужумида беш киши, Жениндаги учувчисиз учоқ ҳужуми ва қуролли тўқнашувларда яна олти киши ҳалок бўлган.

Фаластин манбаларига кўра, Женинга олиб борадиган асосий йўллар тўсиб қўйилган. Шаҳарда жойлашган қочқинлар лагери ҳудудида қуролли тўқнашувлар давом этмоқда. Маълум қилинишича, тонг саҳарда Исроил авиацияси Женин яқинидаги қишлоқда автомобилни уриб юборган. Исроил аскарлари Жениндаги шифохонага кириб, Тулкармдаги икки шифохонани тўсиб қўйди.

Хабар қилинишича, Наблусдаги рейдлар икки қочқин лагерини нишонга олган. Тубас яқинидаги Фаръа лагерида шифокорларнинг айтишича, тез ёрдам машиналари Исроилнинг дрон ҳужумидан сўнг ярадорларга етиб боришда қийналмоқда.

Яҳудий давлати Ташқи ишлар вазири Исраэль Кацнинг айтишича, ЦАХАЛ кеча тундан бошлаб Женин ва Тулкарм қочқинлар лагерларида барпо этилган инфратузилмани йўқ қилиш учун тўлиқ куч билан операция бошлаган. Кац Эронни Ғарбий Соҳилда Исроилга қарши янги фронт очишга интилаётганликда айблади.

“Биз Ғазодаги террорчилик инфратузилмасига, жумладан, Фаластин аҳолисини вақтинча эвакуация қилиш ва барча зарур чораларга қандай муносабатда бўлсак, бу таҳдид билан ҳам курашишимиз керак”, дея қўшимча қилди у.

Исроил армияси баёнотида бир қанча тафсилотлар келтирилмаган, аммо ЦАХАЛ, Шин Бет ички хавфсизлик хизмати ва Исроил чегара полицияси “ҳозирда Женин ва Тулкармда аксилтеррор операциясини ўтказаётгани” айтилган.

Женинга олиб борувчи фақат битта йўл очиқ қолган, қолган барча йўллар эса ҳарбийлар томонидан тўсиб қўйилгани айтилади. Шаҳарга кираверишда ҳеч кимни киритмаслик ёки ташқарига чиқаришга йўл қўймаслик учун назорат пунктлари ўрнатилган. Исроил қўшинлари маҳаллий марказий шифохонани ҳам, қўшни Ибн Сино шифохонасини ҳам қуршаб олди.

Воқеа жойида бўлган BBC ходимининг айтишича, шифохонани тарк этмоқчи бўлганлар исроиллик ҳарбийларга шахсини тасдиқловчи ҳужжатларни кўрсатиши ва тинтув қилиниши керак. Женин шаҳрида жойлашган қочқинлар лагерида ҳам қидирув ишлари олиб борилмоқда.