Исроил АҚШнинг оғир бомбаларини қабул қилди

АҚШ Президенти Дональд Трамп ўзидан олдинги президент Жо Байден маъмурияти томонидан экспортига қўйилган чекловларни бекор қилганидан сўнг, Исроил АҚШдан МК-84 оғир бомба юкини олди. Бу ҳақда 16 февраль куни Исроил Мудофаа вазирлиги Facebook'даги постида маълум қилди.

Шу куни журналистлар билан суҳбатда Трамп ўт очишни тўхтатиш тўғрисидаги келишувга қарамай, Байденнинг бомба тақиқини бекор қилганини, чунки у “куч орқали тинчликка” содиқлигини айтди.

“Улар бу ўқ-дориларни Байден маъмурияти даврида буюртма қилишган, аммо Байден бу қуролларни етказиб бермаган. Лекин мен бунга бошқача қарайман. Мен айтаман: “куч орқали тинчлик”, деди Трамп Флорида штатидаги Вэст-Палм-Бичга, Дайтона-Бичга сафаридан қайтганидан кейин.

МК-84 2000 фунт (907 кг) бўлган бошқарилмайдиган бомба бўлиб, қалин бетон ва металлга кириб, кенг вайронагарчилик майдонини яратиши мумкин. Байден маъмурияти, агар улар Ғазо секторининг аҳоли зич жойлашган ҳудудларида ишлатилса, ҳалокатли оқибатларга олиб келишидан қўрқиб, Исроилга экспорт қилишни маъқуллашдан бош тортди. 2023 йил 7 октябрдан сўнг Байден маъмурияти Исроилга минглаб 2000 фунтлик бомба жўнатган, бироқ кейинчалик юклардан бирини тўсиб қўйган. Бу чеклов январь ойида Трамп томонидан бекор қилинган эди.

“Бугун кечқурун Исроилга келган ва Трамп маъмурияти томонидан чиқарилган ўқ-дорилар ЦАХАЛ учун муҳим стратегик манба бўлиб, шунингдек, Исроил ва Қўшма Штатлар ўртасидаги мустаҳкам иттифоқни тасдиқлайди”, деди Исроил Мудофаа вазири Исроил Кац.

Етказиб бериш январь ойида Ғазода эришилган мўрт ўт очишни тўхтатиш ҳақидаги хавотирлар фонида амалга оширилди. Ҳар икки томон бир-бирини урушларни тугатиш ва Ғазода гаровга олинганларни Исроил қамоқхоналарида сақланаётган фаластинликлар билан алмашишга қаратилган келишувларни бузишда айблади.