Испания Ғазодаги геноцид учун Исроилга санкция киритди

Испания Бош вазири Педро Санчес Ғазодаги геноцидга жавобан Исроилга қарши тўққизта санкция киритилишини эълон қилди. У Мадриддаги Монклоа шаҳрида сўзга чиқиб, уИсроилнинг Ғазодаги ҳаракатлари мудофаа эмас, балки ҳимоясиз халқни йўқ қилиш эканини таъкидлади.

“Испания Исроилнинг ҳужумларини ўзи тўхтата олмайди. Бизда атом бомбалари, самолёт ташувчилар ёки катта нефть захиралари йўқ, аммо бу Исроилни тўхтатишга уринишларимизни тўхтатамиз дегани эмас”, деди Санчес.

БМТ маълумотларига тўхталиб, Санчес сўнгги икки йил ичида Исроил Ғазо ва Ғарбий Соҳилда 63 мингдан ортиқ одамни ўлдирганини, 15 мингдан ортиқ одам яраланганини, 250 мингга яқин одам очарчиликка дучор бўлганини, ярми вояга етмаганлар бўлган 2 миллионга яқин киши уйини ташлаб кетишга мажбур бўлганини эслатди. У Исроил геноцид содир этаётганини бир неча бор таъкидлаган.

Санчеснинг қайд этишича, Испания охирги икки йил ичида ҳам инсонпарварлик ёрдами, ҳам сиёсий ва ҳуқуқий чоралар орқали барқарор оташкесимга эришиш учун қадамлар ташлаган.

“Испания Ғазодаги геноцидни тўхтатиш ва Фаластин халқини қўллаб-қувватлаш учун зудлик билан кучга кирадиган тўққизта қўшимча чора кўрди”, деб таъкидлади Бош вазир.

Унинг тушунтиришича, асосий чора-тадбирлардан бири – қурол эмбаргосининг жорий этилиши бўлади.

“Исроилга 2023 йил октябрь ойидан бери амалда бўлган қурол эмбаргосини қонунийлаштирадиган қироллик фармони зудлик билан тасдиқланади. Бу фармон Исроил билан қурол-яроғ, ўқ-дорилар ва ҳарбий техника билан боғлиқ ҳар қандай битимларни қонуний ва доимий асосда тақиқлайди”, деди Бош вазир.

Шунингдек, Санчес Исроил қуролли кучлари учун ёқилғи олиб кетаётган кемалар, шунингдек, Исроил учун мудофаа жиҳозларини олиб кетаётган барча самолётларнинг Испания портлари ва ҳаво ҳудуди орқали ўтиши тақиқланишини айтди. 

“Ғазодаги геноцид, инсон ҳуқуқлари бузилиши ва уруш жиноятларига бевосита алоқадор бўлган барча шахсларнинг Испанияга кириши тақиқланади”, дея қўшимча қилди у.

Бу чоралар Исроил Бош вазири Биньямин Нетаньяху ва унинг ҳукуматининг барча аъзоларига таъсир қилиши кутилмоқда. Испания томонидан эълон қилинган бошқа чора-тадбирлар орасида Исроил томонидан босиб олинган Фаластин ҳудудларидан импорт қилишни тақиқлаш, бу ҳудудларда яшовчи испан фуқаролари учун консуллик хизматларини чеклаш, Фаластин давлати билан ҳамкорликни кучайтириш, Рафаҳ ўтиш жойидаги Европа Иттифоқи миссияси ходимлари сонининг кўпайиши ва Испаниянинг бир нечта лойиҳалар, Бирлашган Миллатлар Ташкилотига қўшган ҳиссасини ошириш киради.

Санчеснинг сўзларига кўра, Исроилга қарши барча санкциялар Вазирлар Кенгашининг эртанги йиғилишида тасдиқланади ва дарҳол кучга киради.