Испания футбол федерацияси “Барселона”га қарши иш қўзғатди

Испания Қироллик футбол федерацияси (RFEF) “Атлетико Мадрид”нинг шикоятидан сўнг “Барселона”га нисбатан интизомий иш қўзғатди. Бу ҳақда “СadenaSER” нашри хабар берди.

Маълум қилинишича, “Атлетико Мадрид” клуби “Барселона”ни ҳужумчи Хулиан Алварес билан амалдаги шартномаси мавжуд бўлишига қарамасдан, рухсатсиз алоқа ўрнатганликда айбламоқда.

Мадрид клуби фикрича, “Барселона” FIFA’нинг футболчиларни шартноманинг дастлабки йилларида бошқа клубларнинг ноқонуний аралашувидан ҳимоя қилувчи қоидаларини бузган.

Ҳозирда мазкур ҳолат юзасидан RFEF расман “Барселона” нисбатан интизомий иш қўзғатган ва ишни кўриб чиқиш учун махсус терговчи тайинлаган.

Каталония клуби эса иш юритилиши бошлангани ҳақида расмий хабардор қилинган. Энди клуб ўз тушунтиришларини тақдим этиш ва ўз позициясини ҳимоя қилиш имкониятига эга.

Эслатиб ўтамиз, аввалроқ “Барселона” Хулиан Алварес билан шахсий шартлар бўйича келишувга эришгани ҳамда “Атлетико Мадрид”га 100 миллион евролик расмий таклиф юборгани ҳақида хабар берилган эди. Кейинчалик Мадрид клуби каталонияликларнинг ушбу таклифини рад этган.