Исиба Трампга олтин дубулға совға қилди

АҚШ Президенти Дональд Трампнинг иккинчи муддати бошлангандан кейин унинг Оқ уйдаги иккинчи хорижий меҳмони бўлган Япония Бош вазири Сигеру Исиба унга самурайларнинг олтиндан ясалган дубулғаси — кабутони совға қилди. Бу ҳақда “Kyodo News” нашри хабар берди.

Қайд этилишича, мазкур дубулға Япония ғарбидаги Тоттори префектурасида фаолият юритувчи Ningyouno Hanafusa Cо. компанияси томонидан тайёрланган. Икки етакчининг учрашуви 7 февраль куни Вашингтонда бўлиб ўтганди.

Агентлик манбасига кўра, Бош вазир Исибада совға ғояси америкаликлар томонидан суратга олинган “Сёгун” сериали эришган машҳурлик сабаб пайдо бўлган. Шунингдек, АҚШ Президентига олтин ранги ёқиши ҳам маълум. 2016 йилда Вашингтонга ташриф буюрган Япония собиқ бош вазири Синдзо Абэ Трампга олтиндан ишланган гольф клюшкасини совға қилганди.

Бу галги совға – дубулғани тайёрлаган компания маълумотларига кўра, самурайлар бош кийимининг эни 57 сантиметр, баландлиги 81 сантиметр ва чуқурлиги 48 сантиметрни ташкил этади. Унинг нархи — 168 минг иена (1100 доллар). Фирмага самурайлар бош кийимини тайёрлаш буюртмасини ўтган йилнинг ноябрида Япония Ташқи ишлар вазирлиги берган. Аммо улар кабуто чет эллик VIP-шахсга совға қилинишини билган холос.

Маълумот учун, икки давлат етакчилари жорий йилнинг 7 февраль куни учрашганди. Япония Бош вазири Дональд Трамп билан учрашиш учун АҚШга келган иккинчи чет эл давлати раҳбари бўлди. Биринчи бўлиб Вашингтонда Исроил ҳукумати раҳбари Биньямин Нетаньяху ташриф буюрганди.