“Иштиёқингни йўқотма”. Роналду Кварацхелияни қўллаб-қувватлади

Беш карра “Олтин тўп” соҳиби Криштиану Роналду Чемпионлар лигаси доирасида “Барселона”га қарши ўйинда ўнг тиззасининг олдинги хочсимон боғламини узиб олган ПСЖ ярим ҳимоячиси Хвича Кварацхелияни қўллаб-қувватлади. Роналду грузиялик футболчини қийин дамларда руҳан тушкунликка тушмасликка ва ўз кучига ишонишда давом этишга чақирди.

Маълумотларга кўра, Грузия терма жамоасининг 25 ёшли футболчиси камида олти ой майдонга туша олмайди. У яқин кунларда жарроҳлик амалиётини ўтказади.

“Футболдаги энг қийин курашлар кўпинча эътибордан четда қолади. Бу туйғуни яхши биламан, Квара. Сени бугунги даражага олиб келган йўлни ҳеч қачон унутма ва қийин дамлар ўз қобилиятингга шубҳа билан қарашга мажбур қилишига йўл қўйма. Иштиёқингни йўқотма. Энг яхши кунлар ҳали олдинда”, деб ёзди Роналду Кварацхелиянинг Instagram’даги пости остидаги изоҳда.

Кварацхелиянинг жамоадошлари Ферран Торрес, Маркиньос, Дезире Дуэ, Ашраф Ҳакими, Илля Забарний ва бошқа футболчилар ҳам уни қўллаб-қувватлади.

Маълумот учун, Кварацхелия 2025 йил январь ойида Италиянинг “Наполи” клубидан ПСЖга ўтган. У жорий мавсумда парижликлар сафида барча мусобақаларда 11 та учрашувда майдонга тушиб, икки марта гол урди.

ПСЖ сафида Кварацхелия икки мартадан Чемпионлар лигаси, Франция чемпионати ва UEFA Суперкубогида ғолиб чиққан. Шунингдек, у Франция кубоги, Франция Суперкубоги ва Қитъалараро кубокни бир мартадан қўлга киритган.

Кварацхелия 2025-2026 йилги мавсум якунлари бўйича йилнинг энг яхши футболчисига топшириладиган “Олтин тўп” мукофотига номзодлар рўйхатига ҳам киритилган.