iPhone нархи 3,5 минг долларга чиқиши мумкин – CNN

Агар iPhone’ни АҚШда ишлаб чиқариш йўлга қўйилса, унинг нархи уч баравардан кўпроқ ошиб, минг доллардан тахминан 3,5 минг долларгача етиши мумкин. Бу ҳақда Wedbush Securities молиявий компаниясининг глобал технологиялар бўйича тадқиқотлар бўлими раҳбари Дэн Айвзга таяниб, CNN хабар берди.

Ҳозирда iPhone’нинг асосий қисмлари Осиёда ишлаб чиқарилади: чиплар асосан Тайванда, экран панеллари эса Жанубий Корея компаниялари томонидан етказиб берилади. Қолган компонентларнинг катта қисми ва қурилманинг якуний йиғилиши – тахминан 90 фоизи Хитойда амалга оширилади. Айни дамда АҚШ ва Хитой ўртасида савдо уруши кетмоқда: АҚШ томони 125 фоизлик, Пекин эса 84 фоизлик божлар жорий қилган.

Айвзнинг таъкидлашича, Apple етказиб бериш занжирини АҚШга кўчириш имкониятини кўриб чиқмоқда. Масалан, компания Ғарбий Виржиния ва Нью-Жерсидаги заводлардан фойдаланиши мумкин. У ерда электрон қурилмалар учун чиплар ишлаб чиқарилади. Унинг ҳисоб-китобига кўра, етказиб бериш занжирининг атиги 10 фоизини АҚШга кўчириш 3 йил вақт ва 30 миллиард доллар маблағ талаб қилади.

Эслатиб ўтамиз, аввалроқ Apple Дональд Трамп томонидан жорий этилган янги импорт божлари кучга киришидан олдин, март ойининг охирида уч кун ичида Ҳиндистондан АҚШга iPhone ва бошқа маҳсулотлар билан тўлдирилган бешта юк самолётини юборгани ва америкалик харидорлар бож жорий этилиши ортидан нархлар кескин кўтарилишидан чўчиб, компания дўконларига оммавий бораётгани хабар қилинган эди.