Америкаликлар нарх ошиб кетишидан қўрқиб, оммавий iPhone сотиб олмоқда

АҚШ Президенти Дональд Трамп маъмурияти томонидан янги божлар жорий этилиши Apple акцияларининг тушишига ва бир вақтнинг ўзида iPhone’га бўлган талабнинг кескин ошишига сабаб бўлди. Харидорлар Apple маҳсулотлари ишлаб чиқариладиган Хитой товарларига 54 фоизлик бож жорий этилиши ортидан нархлар кескин кўтарилишидан чўчиб, компания дўконларига оқиб бормоқда. Бу ҳақда “Bloomberg” хабар берди.

Нашрнинг ёзишича, АҚШдаги Apple ходимлари ўтган дам олиш кунлари мижозлар сони кескин ошганини тасдиқлаган. Деярли ҳар бир харидор “iPhone нархи яқин кунларда ошадими”, деб сўраган. Янги моделларнинг савдоси бошланган пайтлардагидек навбатлар бўлмаган бўлса-да, муҳит таранг бўлган. Ташвишга тушган харидорлар Apple қурилмаларини оммавий равишда сотиб олган, оқибатда компаниянинг шу ҳафта охиридаги даромади сўнгги йиллардаги шу фаслдагидан юқори бўлган. Apple эса вазият юзасидан изоҳ беришдан бош тортган.

Маълумот учун, атиги икки кун ичида Apple’нинг капитализацияси ярим триллион долларга камайган, акциялари эса 2001 йилдан бери энг катта пасайишни бошдан кечирган. Компания эса зарбани юмшатиш учун ҳаракат қилмоқда – ишлаб чиқариш захираларини оширмоқда ва ишлаб чиқаришнинг бир қисмини Хитойдан Ҳиндистон ва Ветнамга кўчирмоқда. Бу ерда божлар пастроқ. Apple фақат iPhone эмас, балки Apple Watch, Mac, AirPods ва iPad'ни ҳам Хитойда ишлаб чиқарган. Айрим Mac моделлари эса ҳозирда Ирландия, Таиланд ва Малайзияда йиғилади.

Таҳлилчилар фикрига кўра, iPhone нархи сезиларли даражада ошиши мумкин, аммо Apple бу борада етказиб берувчиларга босим ўтказиб, ўз фойдасидан воз кечиши эвазига нархларни сақлаб қолишга ҳаракат қилади. Ҳозирда Apple флагманларининг бошланғич нархи 2017 йилдан бери 999 доллар даражасида қолмоқда.

Apple бош директори Тим Кук ва молиявий директор Кеван Парех 1 май куни иккинчи чорак молиявий ҳисоботини тақдим этиши кутилмоқда. Унда божлар мавзуси ҳам кўтарилиши мумкин.

Эслатиб ўтамиз, аввалроқ Дональд Трамп томонидан жорий этилган янги импорт божлари кучга киришидан олдин, март ойининг охирида уч кун ичида Ҳиндистондан АҚШга iPhone ва бошқа маҳсулотлар билан тўлдирилган бешта юк самолётини юборгани хабар қилинган эди. Apple бу ҳаракати билан компаниянинг АҚШдаги омборларида бир неча ойга етадиган маҳсулот захирасини тўлдирган. Бу эса маҳсулот нархларини вақтинча оширмасликка ёрдам беради.